Морко районысо тӱвыра пӧртлаште район кӱкшытан семинар-влак эртаралтыт. 24 майыште 24 тӱвыра пашаеҥ Кораксола да Марий Кужер тӱвыра пӧртлаште уна лийын. Нуно йоча-влаклан модыш да спорт площадкылам келыштарыме, йоча дискотекым эртарыме, «Йоча пагытым аралена» профилактике операцийым вияҥден колтымо нерген каҥашеныт.
Морко районышто рӱдӧ клуб системе вуйлатышын алмаштышыже Л.Ф.Кириллова тӱвыра илышыш шыҥдаралт толшо у закон дене палдарен, ты аланыште эртаралтше таҥасымаш-влакым иктешлен да эн чолга тӱвыра пӧрт-шамычлан чап кагазым кучыктен. Клуб-влак пеленысе сводный отряд-влакын пашаштлан вуйын шогышо Л.В.Токташева 1-21 июньышто шукталтшаш пашам радамлен.
Семинарыште Кораксола тӱвыра пӧрт нергенат каласкалыме: Шӱргыял школ дене пеҥгыде кылым кучымыжо, клуб пелен кружок-влакын пашашт каен шогымо да «Муро кумыл» фольклор ансамбльын районысо да республикысе мероприятийлаште усталыкшым терген шогымыж нерген. Районысо «Виктория» муро таҥасымаште 2-шо верым налме, «Эн сай тӱвыра пашаеҥ» стенд таҥасымаште чап кагаз дене палемдалтме, «Изи памаш» усталык конкурсышто ончылно лиймына, «Телын моторлыкшо», «Шочмо кундемын ямже» фототаҥасымашлаште посна дипломым налмына, республикысе «Тӱшкаште – мемнан вийна» таҥасымаште да «Сӱан толеш!» фестивальыште калык пагалымашке шумына – чылажат пытартыш жапысе тӱвыргӧ паша лектышнам ончыкта. А кызыт Кораксола тӱвыра пӧрт районысо Пеледыш пайремлан да регион-влак кокласе Семык пайремлан ямдылалтеш. Тыгак «Муро кумыл» ансамбльна лишыл жапыште Кинер кундем калык ончыко кугу концерт программе дене лекшаш.
Тыге Морко кундемысе тӱвыра аланыште шолын шогышо илышыш мемнанат надырна возеш.
Елена Григорьева, Кораксола тӱвыра пӧрт вуйлатыше.
Снимкыште: Морко районысо тӱвыра пашаеҥ-влакын Кораксолаште эртаралтше семинарышт годым.
