Пашат тӱткылыкым йодеш? Машинам виктараш нелылык лектеш? Тунеммаштет шуко йоҥылышым ыштет? Тугеже тӱткылыкым вияҥдаш икмыняр упражненийым темлена.
Мӧҥгешла шотлымаш. Иктаж-могай кугу числам ойырен налза да мӧҥгеш шотлаш тӱҥал: 7845, 7844, 7843… Умбакыже 1 дене огыл, а 3 але 5 дене кудалте.
Ӱзгарым шымлымаш. Кеч-могай ӱзгарым нал. Тидлан ручка, карандаш, кӱмыж келшен толыт. Тудым чыла могырым ончен лек, пуйто икымше гана ужат. Шкаланет тӱрлӧ йодышым шынде: молан лач тыгай форман, могай материал гыч ыштыме, кӧргыштыжӧ мо, могай элыште тудым ыштыме?
Мутым мӧҥгешла лудмаш. Ондак кӱчык мут гыч тӱҥалаш лиеш. Тудым йӱкын каласе, вара – мӧҥгешла: пырыс – сырып, пӧрт – трӧп. Куштылгын чучеш гын, нелырак да кужурак мутым нал.
«Лум чумырка». Тиде модышышто кок але утларак еҥ модын кертеш. Икымше участник ик мутым каласа, весе тудым уэш ойла да шке гыч ешара. Тыге кажне гана мут-влакым ушештарыман да ум ойлыман. Кунам иктаж участник мут шинчырым «кӱрлеш», тунам модыш пыта.
Каласкалымаш. Кином ончаш але книгам лудаш йӧратет? Лудмо але ончымо почеш, сюжетым шарналтен, йолташлан, лишыл еҥлан каласкале. Пелен улшо еҥ-влак икмыняр йодышым пуат гын, пайдалырак лиеш.
Тӱткылыкым вияҥдаш чыла тиде упражненийым кажне кечын ышташ кӱлеш. Тылеч посна тӱҥ пашадам ыштыме годым каналташ жапым ойырыза. Иктаж-могай кугу пашам ӱшаненыт гын, тудым шеледен ыштыза.