Пытартыш жапыште вӱд воктене каныш годым йоча-влак шукын колымо случай ешаралтын. Марий Эл Республикын Гражданский обороно да калыкым аралыме комитет вӱд воктене каныме годым лӱдыкшӧ шотышто правилым эскераш да тӱткӧ лияш ӱжеш.
Кеҥеж каныш жапыште йоча-влак дене вӱдыштӧ тӱрлӧ эҥгек лиеда. Тений май-июнь тылзылаште гына Волжск олаште, Волжский, Кужэҥер да У Торъял районлаште йоча-влак вӱдыш пуренгаен коленыт.
2021 ий 18-19 майыште Марий Элыште кок йоча дене туткар лийын.
18 майыште У Торъял районысо Немда эҥерыште 9 ияш йоча колен. 19 майыште Волжск оласе Конопляное ерыште 15 ияш рвезе колен. Тудо йӱштылаш келыштарыме матрас гыч яклештын (сер марте 40 метр гына кодын). Рвезе ийын моштен огыл.
7 июньышто Кужэҥер район Тошто Йӱледӱр ял воктенысе ерыште 9 ияш ӱдыр шке ыштыме шоло дене йӱштылшыла пуреҥгаен. Тушто эше 6 еҥ лийын, кугуракшылан – 16 ий.
27 июньышто Волжский район Петьял илемысе Кӱшыл Азъял ден Учимсола (Учейкино) ялла кокласе плотинаште 2016 ийыште шочшо йоча вӱд йымак каен. Тудо Казань ола гыч. Ончылгоч эртарыме шымлымаш почеш, амалже – йӱштылаш келыштарыме тыртыш гыч яклештмаш. Тыгай туткар ача-ава дене пырля каныме годым лийын.
Йоча-влакын вӱдыштӧ колымын тӱҥ амалже: икшывым вӱд воктене эскерыдымаш; вӱдыштӧ лӱдыкшӧ правилым шуктыдымаш; йочан ийын моштыдымыжо; йӧнештарыдыме вер.
Туткар лийме ынже лий манын, вӱд воктене йоча-влакым кугыеҥ деч посна кодаш ида тошт. Ида мондо: йочан илышыже – кугыеҥын кидыштыже!