Кажне калык шке кугезе йӱлаж дене кугешнен шогышаш, тудлан эҥертен илен моштышаш. А шке калыкын илыш да пайрем йӱлажым сайын палыше, эреак шымлен шогышо ончылъеҥна-влак шинчымаш поянлыкыштым самырык тукым дене лош пайлышаш улыт. Лач ты амал дене чумыр Марий кундемна мучко тӱвыра аланыште «Тӱшкаште мемнан вий-куатна» («В единстве наша сила») таҥасымаш эртаралтеш.
Морко кундемыштына кажне кечын кок але кум тӱвыра пӧрт марий калыкнан могай-гынат илыш шӧрынжӧ дене палдара. Икте пайрем йӱлам ончыкта, весе – шошо ага почмашым, кумшо модыш йӱла дене кугезе жапыш пӧртылта. Теве Кораксола тӱвыра пӧрт Шӱргыял школышто тунемше икшыве-влак дене пырля «Кугезе модыш» йӱла дене палымым ыштыш. Йоча-влак тошто модыш-влакым пален налыныт. «Шокшо пареҥге» модыш полшымо дене ӱдыр-рвезе-влакын уш-акылышт вияҥеш, усталыкышт шуаралтеш. «Сокыр тага» модыш коклаштышт кылым пеҥгыдемда, келшымаш тул шочеш. А «Йыдал» модыш кугезынан илыш йӱлаж нерген шуко ум почын пуа. Йоча-влак коча-коваштын чиемышт, йыдалын кузе ышталтмыже нерген шуко сай материалым ушышкышт пыштеныт. Модмо годым йыр пӧрдшӧ йыдал нигӧн йолыш ынже логал манын, кажныже кӱшкырак тӧршталташ тыршен, тидыже йочан тазалыкшылан ешартыш пайдам пуэн. «Олымбал» модышышто йоча вӱдышын лудышыжым умылаш тыршен колыштеш, а вара шкалан йолташым ойыра да тудым куржын ончылташ тырша, тыге олымбалне верым шкалан сеҥен налнеже.
Ты пайрем кечына кок ужаш гыч шоген. Иктыже калык модыш йӱлам почын пуымашлан пӧлеклалтын гын, кокымшо ужашыже Лекайн кундемысе уста кидмастар-влак дене кылдалтын. А мемнан тыгай талантан кидмастарже – Кирилловмыт еш. Софья Николаевна пидеш, урга, тӱрла, а Александр Викторович мозаикым пога. Ты кечын Кораксола тӱвыра пӧртнамат лач нунын пашашт дене сӧрастарыме. Йырваш тыгай мотор ончер шочын!
Тыге Шӱргыял школын чолга тунемшыже, «Рвезе тукым» йоча ушемын писе пионерже да Лекайн кундемын ончылъеҥже-влак «Тӱшкаште мемнан вий-куатна» республикысе таҥасымашын икымше йыжыҥыштыже чолгалыкым ончыктеныт. Йоча-влак иктым умыленыт: тӱшкаште лият гын, чыла сеҥаш лиеш, вий-куатет ешаралтеш, илышымат вес шӧрын гыч ончаш тӱҥалат. Ынде мыланна лач иктешлымашым вучаш да сеҥымашлан ӱшанаш кодеш.
Елена Григорьева, Шӱргыял школын марий йылме туныктышыжо да Кораксола тӱвыра пӧрт вуйлатыше.
