Уста да палыме кидмастар Надежда Акиева кызытсе жаплан келшыше вургемым ямдыла. Тудын чатка тувыржым, блузкыжым але костюмжым ятыр марий ӱдырамашын капыштыже ужаш лиеш.
Тений Надежда икымше кугу коллекцийжым калык ончыко лукто. Тудым 2 ноябрьыште Йошкар-Олаште Этноэкофорумыштат чумырымо ыле. Тылеч онччычат коллекцийжым ончыктен ыле. Тушто шым тӱрлӧ вургем лийын. Нунын коклаште кажне кечын офисыш але торжественный мероприятийыш чийыме вич тувыр, кок костюм (блузко ден юбко; блузко ден йолаш) улыт.
У коллекцийже
Пошкырт кундем Калтаса район Шоръялын ӱдыржӧ школ деч вара, туныктышо лияш шонен, Благовещенскысе педучилищыш каен. Туддеч вара МарГУ-што филолог специальностьым налын, аспирантурышко тунемаш пурен ыле. Варажым ик жап Калык усталык рӱдерыште пашам ыштен. Туштак марий тӱрым тӱрлаш тунемын, тудын мом ончыктымыжым умылкален.
Паша коллекцийым ончыктымашым кидмастарын шкешотан сеҥымашыже семын палемдыман. Вет тыгай корным кажне кидмастар ойырен огеш нал.
Надежда пытартыш куд ийыште вургемым тӱрлымӧ пашам чолган шукта. Тылеч ончычат тӱрлен, тыгак сӧрастарыш дене шинчылтын. Мутлан, пылыш кӧржым посна да шӱшер дене пырля ыштен, паспорт комым марий узор дене келыштарен, илышын йодмыж почеш марий орнаментан маскыжат шочын.
– Тиде деловой стилян вургем коллекцийым У ий пайрем деч вара ышташ тӱҥалынна. Молан тӱҥалынна? Кызыт мылам пашаштем ургызо полышкала. Чыла вургем моло сомыл коклаште ышталтын. Тудо тений апрельыште ямде ыле. Тыгодымак йоча-влаклан футболко коллекцийым ямдылыме, – каласыш Надежда.
УМБАКЫЖЕ — 3 ноябрьысе номерыште.
