Йошкар-Олаште Перинатальный рӱдерын акушерско-физиологический корпусшым капитально олмыктымо.
Ик, кок да кум еҥлан йӧнан палате-влакым йӧнештарыме. Кажныштыже душым, инновациян оборудованийым, у мебельым келыштарыме. Тыгак выпискылан пӧлемым ыштыме.
Кодшо ийын Марий Элым Вуйлатыше Ю.Зайцев В.Путин деке тошто Перинатальный рӱдерым олмыкташ полшаш йодмаш деке лектын, вет тиде объект пеш шергыш шуэш. Тылеч ончыч рӱдерын у корпусшым чоҥымо, а ты азам ыштыме верым акушерско-физиологическийыш савыраш кӱлын.
Ик тылзе наре жапыште оксам ойырымо, да пашам тӱҥалме. 264 млн теҥгежым – федеральный бюджет гыч.
Шошым пашам мучашлыме. Чыла пӧлемым санитарный нормо почеш шотыш кондымо. Тыгак патологиян да жап шуде шочшо аза-влак отделенийым почмо. Туштат ава ден азалан йӧнан пӧлем-влак улыт.
Тений медицине мебельым налаш 15,7 млн теҥгем ойырымо. Медицине ӱстембалым, тумбым, шкафым, диваным, кровать-трансформерым, азам ончымаште кӱлеш мебельым налме. Тыгак акушер, гинеколог да моло персоналланат йӧнан паша верым ыштыме.
