Калык медициныште тӱрлемшудо лышташ пуалмым шупшылшо, сусырым эмлыше да вӱр йогымым чарыше йӧн семын кучылталтеш.
Гастрит, энтерит, колит да пагар йора годым 500 мл шокшо вӱдыш кок кугу совла коштымо лышташым пыштыман да изи тулышто 5-10 минут шолтыман, вара эше пел шагат шинчыктыман. Лемым 1/3 стакан дене кечеш кум гана сайрак лиймешке йӱман.
Сусыр кужун парем огеш керт гын, коштымо лышташым 2-3 чӱчалтыш кушкыл ӱй дене порошок марте туржман да 1:9 кугыт дене вазелин дене варыман. Тудым сусыр пареммешке йыгыман.
Стоматит, пародонтоз годым ик стакан шокшо вӱдыш ик кугу совла лышташым пыштыман, йӱкшымешке шинчыктыман, шӱрыман да умша кӧргым шӱалтыман.
Атеросклероз деч аралалташ, вӱргорным пеҥгыдемдаш манын, ик стакан шокшо вӱдыш ик кугу совла лышташым пыштыман, 20-30 минут шинчыктыман, кечыгут йӱман.