21 апрельыште «Точка кипения – Йошкар-Ола» рӱдерыште «Поправки к Конституцию Республики Марий Эл: взгляд молодых учёных» научно-практический сынан «йыргешке ӱстел» лийын. Тудым МарГУ ден «Ассоциация юристов России» мер организацийын регионысо пӧлкаже эртареныт.
Тушто Марий Эл Республикын Конститутцийжым тӧрлымӧ шотышто пашаче группын еҥже-влак: Марий Эл Республикым вуйлатышын администрацийжын алмаштышыже Рудольф Золотарев, айдемын праваже-влак шотышто уполномоченный Фанис Мухаметгалиев, мер-политике рӱдерын вуйлатышыже Эдуард Александров, МарГУ-н ректоржо Михаил Швецов, тыгак МарГУ-со юридический факультетын туныктышыжо, студентше-влак – погыненыт, докладым ыштеныт.
«Йыргешке ӱстел» годым тӧрлатымашым пуртымым сайлан шотлымо. Эдуард Александровын мутшо почеш, икшыван еш-влаклан утларак полышым пуаш тӱҥалыт.
Йодышлан – вашмут:
– 17 ияш эргым пашашке пурен кертеш мо?
Марий Эл Республикысе прокуратурын пӧлкажын кугурак прокуроржо Дарья Гомзина вашешта:
– Кертеш. Паша Кодексын 63-шо статьяж почеш 18 ийыш шудымо-влакым пашаш налме трудовой законодательствым пудыртымылан ок шотлалт.
Но Паша Кодексын 265-ше статьяж дене келшышын, 18 ийыш шудымо-влакым эҥгек лийын кертме да лӱдыкшӧ паша условийыште, мланде йымалне ыштыме, тыгак тазалыклан да нравственный эҥгекым кондышо (модмо бизнес, клубышто йӱдым ыштыме, аракам йӱмӧ, тамак изделийым ямдылыме, шупшыктымо, ужалыме пашашке да тулеч моло) пашашке колташ огеш лий.
Нунылан нормо деч утла нелытан пашам ышташ огеш лий.
Тыгай икшыве-влак йӱдым пашам ыштен огыт керт. Паша законодательстве дене келшышын, пашам палемдыме жап деч шуко, йӱдым, каныш але пайрем кечын ышташ огеш лий.
СМИ-ште, кинематографий организацийлаште, теле- да видеосъемочный коллективлаште, театр да концерт организацийлаште, цирклаште да произведенийым ямдылыше, исполнитель-влак пурталтыт ыштен кертыт.
Патриотический слёт
26 апрельыште Йошкар-Олаште самырык еҥ-влак «Шарнымаш вахте» Россий акцийышке ушненыт. Сеҥымашын XXX идалыкше лӱмеш тӱвыра полатыште «Сеҥымашын тукымжо улына» самырык патриот-влакын слётышт лийын.
Тушко патриотический организаций, военно-патриотический клуб-влакын воспитанникышт погыненыт. «Профессиональная кадетская лига» конкурсын участникше, муниципальный общеобразовательный школласе профильный кадет классла гыч тунемше-влак вуйлатышышт дене лийыныт.
Слет годым «Профессиональная кадетская лига» конкурсышто сеҥыше-влакым палемденыт. Тушко 250 еҥ: профильный кадет класслаште тунемше, юноармей движенийын да военно-патриотический ушемын воспитанникше-влак – ушненыт.
«Шарнымаш вахте» акций годым тӱрлӧ мероприятий лиеш. Чылажат Кугу Отечественный сарыште элнам аралыше-влакым шарнен илаш, самырык-влак коклаште патриотизм шӱлышым кушташ, шкенан историйым пагалаш кумылаҥдаш манын ышталтын. Май пайрем годым Воин Чап мемориал комплексыште 1-ше №-ан Пост лиеш. 27 апрель гыч 10 май марте муниципальный образовательный учрежденийлаште тунемше, юнармеец, патриотический клуб ден ушем-влакын участникышт оласе воинский мемориал-влак воктене почетан караулышто шогаш тӱҥалыт.
Марина Богданова ямдылен.