Ойгым сеҥаш полшен
Тений кеҥежым Анна кокай ынде 70 ийым тема. Тудо шуко пидеш, тӱрла. Пӧртшым мотор картине-влак сӧрастарат, диванысе, пӱкенысе пидме шартыш-влак поснак ямым пуртат. Анна Алексеевна Володя эргыже да Светлана шешкыже дене пырля ила.
Тудо Шернур район Кӱчыкэҥер ялеш шочын-кушкын. Самырыкше годым спортлан кумылан лийын. Физкультурым туныктышат лияш чонжо ӱжын, но шонымашыже шукталтын огыл. 1972 ийыште Анна Максимова Параньга район Элпанур ялышке марлан лектын. Вате-марий коктынат верысе «Победа» колхозышто тыршеныт. Иван пелашыже шофёр, варажым механизатор лийын. Анна Алексеевна, сулен налме канышыш лекмеш, эре дояркылан ыштен:
– Пелашем дене вич икшывым йол ӱмбак шогалтенна. Но кок ӱдырем ден ик эргым самырыкак илыш дене чеверласеныт. Пелашемын ӱмыр лугыч лиймыжлан ынде ик ий темеш. Ойгым чытен лекташ манын, кидпашам ышташ тӱҥалынам. Кызыт Володя эргым ден Галя ӱдырем коктынат Элпанур колхозышто пашам ыштат. Уныка, кугезе уныкам-влаклан куанен илем, – манеш тудо.
Юмончылысо солыкым тӱрлен
Анна Максимова эше ӱдыр жап годымак кидпашалан мастар лийын. Аваж деч шукылан тунемын.
– Авам Зинаида Яковлевна Молотова ургенат, тӱрленат моштен. Фермыште сӧснам ончен. Шарнем, тунам ургымо машина уке. Вате-влаклан кид дене вынер тувырым урген пуа ыле. Школышто эше сайын тӱрлаш тунемынам. Класс вуйлатышына Анастасия Ефимовна Исаева «Умелые руки» кружокым вӱда ыле. Солыкым, ургымо тувырым канва дене тӱрлымым сайын шарнем.
Марлан толмем деч ончычак шкеак тӱрлеман солыкым ямдыленам. Вынер тувырышкат тӱрым пыштенам. Колхозышто ыштыме годым ик жап окса чӱдылык чот шижалтын. Тунам юмончылысо солыкым гладь дене тӱрлен ужаленам. 2002 ийыште, пенсийышке лекмеке, кидпашам шукырак ышташ пижым. Шарфым, узоран пиж-влакым налше-влак эре лийыныт. Кызыт уныкамлан тувырым тӱрлем, – мане кидмастар.
Пытартыш ийлаште Анна Алексеевна пырдыжеш сакалтыме мотор сӱрет-влакым ырес дене тӱрла. Тӱрлӧ кугытан картиныштыже мотор пӱртӱсым, пеледышым, ош йӱксым, кайыкым, урым, рывыжым да молымат ужаш лиеш. Тыгай пашалан тудо Йошкар-Олашке миен толмекыже кумылаҥын.
– Шуко сӱретым мый школышко, йочасадыш да уна-влаклан пуэденам. Пытартыш жапыште мозаике, шер пырче дене сӱретым поген онченам. Писын ышталтеш, – ойла А.Максимова.
Умбакыже 15 апрельыште лекше у номерыште лудса.