Тений самырык-влаклан iВолга форумышто Марий Эл гыч кок еҥ грантым сеҥен. Иктыже – МарГУ-што тунемше Ландыш Габдулвалеева. Тудын «Онкопатруль 12» проектшылан 182 тӱжем теҥгеаш грантым пуэныт.
Ландыш Габдулвалеева Татарстан Республикысе Нуринер селаште шочын. Шке селасе школым шӧртньӧ медаль дене тунем лектын да МарГУ-н медицине факультетышкыже тунемаш пурен, педиатрий специальностьым ойырен налын. Кызыт ӱдыр – нылымше курсын студенткыже.
Ландыш тыршен тунемеш, тӱрлӧ мероприятийыш чолган ушна. Икымше курс гычак волонтёрлан коштеш, нылымше ий медик-волонтёр-влакын Марий Эл Республикысе пӧлкажын еҥже, пресс-секретарьын сомылжым шукта. Ӱдыр тӱрлӧ конкурсышто участвоватлаа: «Идалыкын студентше», «Амбассадоры. Росмолодёжь. Гранты». Тыгак олимпиадылаште шинчымашыжым терга. Икымше курсышто тунеммыж годым тудо латин йылме да медицине терминологий дене тӱнямбал олимпиадыште икымше верым налын.
Эше Ландыш – МарГУ-со педиатр-влак командын капитанже. 2020 ийыште Л.Габдулвалееван «Профилактическая оздоровительная программа «В движении жизнь!» проектше Росмолодёжьын 250 тӱжем теҥгеаш грантшым сеҥен.
Ландыш тӱрлӧ верыште лияш йӧрата. Тений гына тудо Моско, Санкт-Петербург, Симферополь, Махачкала, Дербент, Самара, Шупашкар, Озаҥ да Краснодар олалаште лийын. Эртыше кечылаште Шупашкарыш эше ик гана миен толаш амал лектын – 11-13 ноябрьыште тушто Юл кундем федеральный округысо волонтёр-медик-влаклан «HealthCare» регион-влак кокласе форум эртаралтын.
А 28 октябрьыште Краснодар олаште МарГУ-н педиатр-влак командыж дене пырля Ландыш вуз-влак кокласе «Мастер педиатрии» олимпиадыш миен. 21 команде кокла гыч МарГУ-н командыже визымше верым налын, а вашкеполыш конкурсын «Спаси жизнь» номинацийыштыже университетын командыже сеҥышыш лектын.
– Олимпиадыште ончыч теорийым палымынам тергеныт. Медицине дене кылдалтше тӱрлӧ туштылан вашмутым кычалынна, тест ден задаче-влакым решатленна. Вара Симуляционный рӱдерыште практике ужаш лийын. Тушто икшывым тергенна (тудын кӧргӧ органже-влак тыглай айдемын гай огыл, мӧҥгешла верланеныт), виртуальный пациентлан полшенна, манекенлан наркозым пуэнна, икшывылан вакцинацийым эртарыме шотышто каҥашым темленна. Ты олимпиаде йоча чер нерген ончыкыжымат утларак шымлаш, пален налаш кумылым луктын, – манеш студентке.
Врач лияш Ландыш изинек шонен. Тудлан йоча-влак дене жапым эртараш келша: пырля модаш, уш-акылым вияҥдыше тӱрлӧ модышым шонен лукташ. Садланак ӱдыр педиатрий направленийым ойырен налын. Тугеже вашке республикыштына эше ик сай педиатрлан шукырак лиеш манын пеҥгыдын каласаш лиеш
Л.Габдулвалееван «ОнкоПатруль 12» проектше тений сентябрь гыч вес ий май марте илышыш шыҥдаралтеш. Тӱҥ шонымашыже – калыкым онкологий чер, тудым шке гыч пален налме да профилактике нерген палдараш. Проектлан келшышын, медик-волонтёр-влак Марий Элын тӱрлӧ районыштыжо лийыт да ӱдырамаш-влакым молочный тум шке тергаш туныктат. Грант окса дене молочный ту чер улмым тергаш кок манекеным налыныт: иктыжым капыш чияш лиеш, тушто чызе ракын индеш типшым ончыктымо, весыже – тыглай манекен, тушто рак черан молочный железам ончыктымо. Тыгак врач-онколог дене икмыняр интервьюм видеош войзат. Лишыл жапыште нуным ВКонтакте соцкылысе «Волонтёры-медики Республики Марий Эл» тӱшкаште вераҥдат.