20 июньышто Марий Эл Правительствын еҥже-влак кызытсе илышын йодмо да социально-кӱлешан пашам шуктымым каҥашеныт.
Образований да науко министр Л.Ревуцкая увертарен: тений кеҥежым школ-влак пелен 175 кеҥеж лагерь пашам ышта, тушто 12265 йоча канышаш, ола воктенысе лагерьлаште – 335 икшыве. 2023 ийыште ты сомыллан 217 млн утла теҥге ойыралтеш. Тений «Лесная сказка» лечебно-оздоровительный комплекс угыч пашам ышташ тӱҥалын. Тидлан кӧра ешартыш 987 икшыве канен кертеш.
Ялозанлык да продовольствий министр А.Кондратенко тений шошо агам 20 кечылан ондакрак тӱҥалме, кугыжаныш полышым жапыштыже пуымо манын. Кызыт ялозанлык предприятий-влаклан 774 млн теҥгем колтымо, тышеч 47 млн теҥгеже – шурным ончен куштымо сомыллан.
Паша да социальный аралымаш министр М.Островская республикыште СДУ-н (рушлаже – система долговременного ухода) шукталтмыж нерген ойлен. Кызыт тыгай паша пилотный семын вич кундемыште ышталтеш. Тудо Марий Элысе чыла районым авалта. Нине мероприятийлам шукташ тений 754 млн теҥгем ойырымо, тышеч 718 млн теҥгеже – федеральный бюджет гыч.
Марий Элым Вуйлатыше социальный ден медицине услугым пуымо да ты категориян еҥ-влаклан полшымо шотышто порядкым ышташ кӱштен.
.
Фото — Марий Элым Вуйлатышын пресс-службыжын.