3-10 июльышто Башкортостаныште VI тӱнямбал фольклориаде эртаралтын. Ты пайремыш 37 эл гыч 1100 наре уна толын.
Форумым почмо церемонийыште Башкортостан Республикым вуйлатыше Радий Хабиров, Фольклориадын посолжо Надежда Бабкина ден «Русская песня» ансамбль да моло кугу уна лийыныт. Тӱрлӧ эл гыч толшо коллектив-влак ик арня жапыште Пошкырт Республикысе 22 ола ден районлаште: Нефтекамскыште, Салаватыште, Учалыште, Дӧртыльыштӧ, Нефтекамскыште Мишканыште… – лийыныт да погынышо-влакым шке тӱвырашт дене палдареныт. Пырля Пошкырт кундем гыч творческий коллектив-влак ушненыт.
5 июльышто уна-влак Мишкан селаште мастарлыкыштым ончыктеныт. Тыште ямдылыме этнографический площадкыште (Сабантуйым эртарыме верыште) ты кечын Эквадор, Палестина, Франций, Белоруссий, Перу, Йӱдвел Македоний, Румыний гыч самодеятельный артист-влак лийыныт.
Уна-влакым марий, пошкырт, татар, руш кудо-влак шкешт дек ӱжыныт, «Мастар-влакын олашт» пашам ыштеныт.
Уна-влак деч ончыч верысе «Ший памаш», «Акарт», «Хазина», «Полан аршаш», «Эр кече», «Юго», «Рвезылык» фольклор коллектив да мурызо-шамыч мастарлыкыштым ончыктеныт.
Фольклориаде годым Уфаште «Евровидений-2021» конкурсышто Российын чапшым аралыше мурызо Манижа выступатлен. Тудо кумдан палыме «Russian Woman» муры-
жымат йонгалтарен.
Ирина Степанова.