Кодшо арнян «Единый Россий» партийын региональный мер приёмныйыштыжо Марий Элым Вуйлатыше Ю.Зайцев еҥ-влакын йодышыштлан вашештен.
Морко районысо самырык туныктышо-влак ушемын председательже Н.Алексеева Морко районысо М.Н.Янтемир лӱмеш литературно-этнографический тоштерым ачалаш йодын. Тудын палемдымыж почеш, тоштер йоча-влакым патриотизм шӱлышеш кушташ, шочмо кундемысе историйым палаш полша. Тоштерым 1939 ийыштак чоҥымо. Адакшым 2024 ийыште Морко районлан 100 ий темеш. Вес ийын ты тоштерым «Культур» нацпроект почеш капитально ачалаш тӱҥалыт.
У Торъял район Масканур села гыч Л.Зайцева У Торъял гыч Масканур села марте корным тӧрлаш йодын. Ты корно дене тунемше-влакым школыш, икшыве-шамычым йочасадыш кажне кечын шупшыктат, еҥ-влак пашаш кудалыштыт. Ю.Зайцев палемден: ты корно участкым «Безопасные и качественные дороги» нацпроектыш пуртымо. Марий Элын транспорт да корно озанлык министрже А.Герасименко ты корно участкым 2024 ийыште тӧрлен шуктышаш улыт манын.
Йошкар-Ола гыч Н.Куклина Эшпай уремысе 118-ше №-ан аварийный пӧрт шотышто йодышым нӧлталын. Тушто тулотым ылыжтат, кочывӱдым йӱыт, кечывалым йоча-влак модын куржталыштыт. Йошкар-Олан мэржын палемдымыж почеш, тиде пӧртым 2024 ий март мучаш марте пужен шуктышаш улыт.