Тӱрлемшудо пуалмым пытара, сусырым паремда, вӱрым эрыкта, шондым луктеш, давленийым нормыш конда. Тыгак кокырымо, пагар да шоло чер годым пайдале.
Шодо да пагар рак годым тыгыдемдыме свежа лышташ ден сакырым икнаре налман, варыман, шокшо верыште кок арня шинчыктыман. Лемым кечеш кум-ныл гана ик кугу совла дене кочмо деч 20 минут ончыч йӱман.
Свежа тӱрлемшудо лышташым туржман, эмалироватлыме атыш пыштыман. Вара тушко 200-250 мл вӱдым ешарыман да шолаш пуртыман. Вартышыш кум-ныл кугу совла мӱйым ешарыман. Тудым чот кокырымо да температур кӱзымӧ годым ик изи совла дене кажне шагат еда йӱман.
Кокыртышым пытараш тыгай чайым шолташ лиеш. Ик стакан шокшо вӱдыш кок-кум изи совла коштымо лышташым пыштыман, 15 минут шинчыктыман да ик стакан дене кечеш кум-ныл гана йӱман. Чайыш мӱйым ешараш сай.
Ик стакан шокшо вӱдыш кум изи совла коштымо лышташым пыштыман да куд-кандаш шагат шинчыктыман. Лемым 1/3 стакан дене кочмо деч пел шагат ончыч гастрит, колит да пагар йора годым йӱман.
Нӧшмат полша
Тӱрлемшудо нӧш-мым сакыр диабетым але ӱдырамашын мӱшкыраҥ кертдымыжым эмлаш кучылтыт. 250 мл вӱдыш ик кугу совла нӧшмым пыштыман, вич минут шолтыман, эше 30-40 минут шинчыктыман. Лемым ик кугу совла дене кечеш кум гана ик-кок тылзе йӱман. Ты лем пӧръеҥ-влакым импотенций деч арала, простатит черым эмла.
Запор, хронический спазм годым яра пагареш ик кугу совла нӧшмым леве вӱд дене подылын кочман.
Кокырымо годым ик стакан шокшо вӱдыш ик изи совла нӧшмым пыштыман, 15-20 минут шинчыктыман да кочмо деч ончыч ик кугу совла дене йӱман.