Савыкталтше икмыняр марий йӱла календарьыште Тӱрек пазар 28 январьыште лиеш манын ончыкталтын. Но тудо, илалше еҥ-влакын ойлымышт почеш, эре 29 январьыште палемдалтын.
Теве историй науко кандидат, шымлызе Руслан Бушковын «Турекская сторона» книгаштыжат тыгак сералтын. Цитатым рушла возена: «А в нашем районе вянваре отмечается еще один, пожалуй, самый почитаемый праздник – Петров день, также связанный с именем Иисуса Христа. Зимний Петров день попадает на 29 января, летний – 12 июля».
Вара тыште нине пайрем-влакын кушеч толын лекмышт нерген умылтара. Иисус Христосын 12 тунемшыже (апостол маныт эше) лийын. Иктыже – Петр. Лач тудо эн очыч Иисусым юмынъеҥ манын. Марий Турекыште ХIX курым мучаште черкым апостол-влак Петр да Павл лӱмеш чоҥымо. Ты кече гычак Петро пайремым эртараш тӱҥалме, тыгак кугу ярмиҥгамат тиддене кылденыт да Тӱрек пазар манын лӱмденыт.
Марий Турек кундемыште тиде кече шукертсек эн пагалымылан шотлалтеш. Ты пайремлан арня да тылеч ончычат ямдылалташ тӱҥалыныт. Кажне пӧртыштӧ сырам, пӱрым шолтеныт, а кок кум кече ончыч перемечым кӱэшт ямдыленыт. Икте-весышт деке, имне терыш шинчын, унала коштыныт.
Вара ик жаплан ты пайрем йомын. Кызыт у шӱлышым налын, 1991 ий годсек тӱрлӧ семын эртаралтеш. Ты гана тудым 26 январьыште «Заря» районысо каныме да тӱвуыра рӱдерыште эртарыме.
Эльвира Терентьева.
Фото – Тӱрек пазар. 2020 ий.