18 майыште Тоштер-влакын тӱнямбал кечышт. Лудшына-влак тоштерыш коштыт мо?
Вероника Ядыкова, Йошкар-Ола:
– Тоштерлаш такшым чӱчкыдын коштынам. Ешаҥмеке, тидлан жапым муаш изиш йӧсырак. Туге гынат, тушко йӧршынак корным монденам манаш огеш лий. Тений эше миен шуын омыл, но ик кечын йӧн лекме семын миен толаш шонем. Ӱмаште, мутлан, шуко гана тӱрлӧ музейыште лийынам. Йошкар-Оласе Евсеев лӱмеш тоштерыш шкетынак коштынам ыле. Тусо кумшо пачашыште верланыше залыш экскурсийым лӱмын налынам. Марий калыкын эртыме корныжым шымлаш, шанчыеҥ-шамыч деч йодышем-влаклан вашмутым колаш куанле лийын. Моткой келшен! А могай тоштер утларак келшыме шотышто, кажныже ойыртемалтше, мотор да кӱлешан. Уш-акылым пойдараш, уым пален налаш манын, тоштерыш миен толаш уто огеш лий. Тыге ме шке тӱняумылымашнам кумдаҥдена, тӱрлӧ ситуацийым вес могыр гыч ужаш тунемына.