Тӱнямбал пъедесталыште – марий спортсмен-влак

Орёл олаште всестилевой карате дене тӱнямбалын чемпионатше ден первенствыже эртеныт. Тушто Турций, Греций, Казахстан, Иран, Пакистан, Армений, Куба, Россий, Абхазий, Белоруссий, Южный Осетий гыч кок тӱжем утла спортсмен таҥасен.

Марий Эл гыч 32 еҥ ушнен. Нунын кокла гыч кумытынжо Россий Федерацийын всестилевой карате дене сборныйыштыжо улыт. Андрей Альгин тӱнямбал чемпион лӱмым сулен, Данил Фёдоров кумшо лийын. Иван Жирнов кокымшо верым налын,  Юрий Андропов ден Александра Карнилова нылымше лийыныт.

Данил Фёдоров Волжск олаште ила. Зеленодольск оласе ик колледжыште судостроительлан тунемеш. 15 ийым темымеке, карате дене заниматлаш тӱҥалын. Тидлан тудым йолташыже кумылаҥден. Нуно Волжскысо «Tiger Team» клубышто Артём Рафикович Гинусян дене тренироватлалтыт. Данил тылеч ончыч профессионально спорт дене заниматлен огыл. Моло рвезе икшыве семынак уремыште футболла, волейболла модын.

Карате Данилын кумылжым савырен. Кызыт ты спорт илышыштыже кугу верым налеш. Рвезе арняште вич гана кок шагат наре заниматла. Кум ийыште район,  республик, Россий кӱкшытан таҥасымашлаште ик гана веле огыл сеҥыше радамыште лийын.

Кок ий ончыч Орёл олаште Российын чемпионатше эртен. Мый тушто таҥасенам, но сеҥыше коклашке логалын омыл. Тылеч вара идалык гыч туштак кокымшо верым налынам. Тидыже шкемым ты спортышто утларак шуараш, вияҥаш кумылаҥден. Тыге тренировкылан шукырак жапым чын ойыраш тӱҥалынам, – каласыш тудо.

Эртыше чемпионатыште Данил Фёдоров 18 ияш деч кугурак ийготан, 60 кг марте  нелытан спортсмен-влак коклаште таҥасен. Рвезын капкыл нелытше – 63-64 кг, но чемпионатлан тудо лÿмын каҥгештын. Ончыкыжым 70 кг нелытан-влак коклаште таҥасаш ямдылалтеш. Тидлан изиш нелытым погаш шонымыж нерген палдарыш.

Российын чемпионатышкыже логалаш манын, спортсмен отборым эртышаш: ончыч – олаште, вара – республикыште. Российыште сеҥыше-влак тӱнямбал чемпионатыш ушнат. Кодшо ийын Российын чемпионатыштыже Данил кокымшо верым налын, тыге элнан сборный командышкыже логалын. Тений тудо Орёл олаште эртаралтше тӱнямбал чемпионатыште Российын чапшым арален да кумшо верым сулен. Республикна гыч всестилевой карате дене Российын сборныйыштыжо кум еҥ шотлалтеш. Спортын ты видше кундемыштына сайын вияҥеш.

«Всестилевой карате тыглай карате деч мо дене ойыртемлтеш? – йодым Данил деч.

– Нуно захват, подсечке, добиваний-влак дене ойыртемалтыт. Тыгак бальный системыште ойыртем уло, – мане тудо.

Спортсмен деч тыгак спортын ты видыштыже кумирже уло укем йодым. Вашмут тыгайрак лие:

– Артём Рафикович мыланем – чыла шотыштат пример. Мыят тудын гаяк тале, уста спортсмен лияш шонем.

Данил ончыкыжым эшеат сай результатым ончыктынеже. Тидлан физически, морально ямдылалташ кумылжо уло. Такшым спортсмен-влак тыгай кугу таҥасымашке лекмыж годым ямде улмыжым эреак шижшаш улыт, мане. Рвезын кок шольыжат спортлан шӱман кушкеш. Иктыже футбол дене модеш гын, весыжын карате дене заниматлаш кумылжо уло. Тидлан изаже тудлан – пример.

Кеч-могай кугу таҥасымаште шкем тергымаш спортсменлан умбакыже йоҥылыш-влакым тӧрлаш, нунын дене пашам ышташ, иктешлымашым ышташ полша. Данил тыгай кӱкшытан таҥасымаште ятыр гана лийын гынат, шке йоҥылышыжо-влакым умыла да умбакыже нуным тӧрлаш шона. Тидыже кеч-могай спортсменлан вияҥаш, сай кӱкшытыш шуаш шагал огыл надырым ышта. Ӱшанена, Данилын шонымашыже-влак шукталтыт!