Марий кугыжаныш университетын студенткыже Елизавета Маркочева вуз-влак кокласе «Lingua Franca – 2024» тӱнямбал конкурсышто кусарыме пашаж дене кокымшо верым налын.
Тӱрлӧ вере шуаралтын
Елизавета Татарстан кундемысе Агрыз олаште шочын-кушкын. Йот йылмым йӧратымаш ӱдырым Йошкар-Олаш конден. Шочмо мӧҥгыжӧ марте 500 меҥге лиеш, корнылан лу шагат наре жап кая, садлан ӱдыр тушко шуэн коштеш. Е.Маркочева – кумшо курсын студенткыже, ончыкыжым англичан да француз йылмыла дене лингвист-кусарыше лиеш. Шкеж нерген тудо тыгерак палдарыш:
– Изи годсек шуко пален налаш, ум ыштен ончаш кумылан кушкынам. Садланак тӱрлӧ кружокышто шуаралтынам. Фигурный мунчалтымаш, тӱрлӧ куштымаш, спортын чыла гаяк видше дене шкем тергенам. Шахмат да футбол дене сай лектышыш шуынам. Шахмат дене кокымшо кугыеҥ разрядлан нормативым шуктенам. А «Кадеты» футбол командыланна Моско олаште футбол дене Тӱнямбал чемпионатым почмаште мечым пуэдаш ӱшаненыт. Тидланже моткоч йывыртенна, вет тушко логалаш куштылгыжак огыл.
Тыгак волонтёр паша эре сымыстарен. Садлан тӱрлӧ мероприятийышке, конкурсышко чӱчкыдын ушненам. 2020 ийыште «Большая перемена» Российысе конкурсын полуфиналышкыже логалынам ыле. Шукерте огыл Сочиште Самырык-влакын тӱнямбал фестивальыштышт лийынам. Тушто волонтёр-кусарышын сомылжым шуктенам.
Туныктышо-влак кумылаҥдат
Самырык годым, чынжымак, верыште шинчаш келшен огеш тол. Кызытсе ӱдыр-рвезе-влак тидын шотышто пиаланрак улыт. Нунын ончылно тӱжем тӱрлӧ йӧн, ит ӧркане веле. Елизаветан ойлымыж почеш, йот йылме-влак факультетын студентше-шамыч лач тунеммашлан гына жапым огыт ойыро. Нуно тӱрлӧ вере шке чолгалыкышт да уш-акылышт дене ойыртемалтыт.
– Ме шке профессионал моштымашнам тергыме конкурслашке чӱчкыдын ушнена. Тидланже туныктышо-шамычна эреак кумылаҥдат. Кок ий почела поэзийым кусарыме тӱнямбал конкурсышто сеҥыше-влак радамыш логалынам. Кусарыме паша дене кылдалтше конкурс-влаклан Екатерина Евгеньевна Флигинских вуйын шога. Тудо англичан филологий кафедрын кугурак преподавательже. Екатерина Евгеньевна студент-шамыч деке кылым муын, конкурслан кумылаҥден мошта. Туныктышо семын кажне тунемшыжын сай лектышыжлан уло чонжо дене ӱшана. Француз йылмым туныктышо Надежда Геннадьевна Баженован надыржымат палемдыде ом керт. Ты йылмым сайын палымемлан тудлан кугу таум ойлем, – каласкалыш ӱдыр.
Ончыкылыклан кугу шонымаш
Школ деч вара Елизавета лингвистике направлений денак тунемаш пураш шонен. Йот йылмылам сайын палаш тудын эн кугу шонымашыжак улмаш. Ӱдырын ЕГЭ дене баллжат изижак огыл ыле, но Озаҥ оласе иктаж университетыш лингвистике направлений дене тунемаш пураш конкурс моткоч кугу лийын. Садлан тудо Марий Элым ойырен, кеч тылеч ончыч тудым ик ганат ужын огыл.
– Йошкар-Олаш толмем деч ончыч интернетыште фото-шамычым онченам, вуз нерген шымленам. Мыланем келшен, тыге тунемаш толаш эшеат кумылем лектын. Кум ий жапыште ола да калык деке тунемын шуынам. Эн йӧратыме вер але объект улмо нерген палемден ом керт, но Йошкар-Оласе набережный моткоч сылне, мотор да ӧрыктарыше.
Университетым тунем пытарымеке, стюардессе лияш шонем. Тидлан эшеат чот сайын тунемаш тыршем, – шонымашыжым каласыш Елизавета.
Самырык годым илышын сапшым чын да моштен руалтыман. Кызытсе тукым тидым сайын умыла да шке шонымашышкыже шуашак тырша. Тидыже куандара. Ӱшанена, Елизаветан чылажат шонымыж семынак лиеш.
Ӱдырын альбомжо гыч налме фото.