Марий Элын делегацийже Кугыжаныш управленийын тӱнямбал конгрессшын пленарный сессийышкыже ушнен.
Делегацийым Марий Элым Вуйлатыше Юрий Зайцев вуйлатен. Конгресс Москошто уло тӱня гыч кугыжаныш управленийын кызытсе жаплан келшыше йодышла дене эксперт-влакым иктеш чумырен.
Участник-влаклан ямдылыме шомакыштыже Россий Президент Владимир Путин кадровый резервым погымылан, кугыжаныш секторын пашажым пайдалыракым ыштымылан да регионласе эн сай практикым вияҥдымылан тӱткышым ойыраш ойлен.
Марий Элым Вуйлатышын мутшо почеш, конгрессыште лиймаш республикыштына эн сай практикым кучылташ веле огыл, тыгак национальный шонымаш дене кугыжаныш управлений системым вияҥдаш полша.
– Марий кундемыште кадровый резервлан кугу тӱткыш ойыралтеш. Самырык специалист-влакым куштена, тыгак СВО ветеран-шамычым, мутлан, «Герои Марий Эл. Талешке-влак» программын участникше-влакым, пашашке налына, – манеш Юрий Зайцев.
«Госуправление XXI века: между скоростью и смыслом» пленарный сессийыште кучемысе орган-влакын цифровой трансформацийышт да айдеме потенциалым ешарыме, тыгак бизнеслан сай условийым ыштыме, калыклан качестван услугым пуымо нергенат ойленыт.
Рамкыш: Конгрессыште 12 эл гыч (тыгодымак Индий, ОАЭ, ЮАР, Киргизий да Таджикистан гычат) 1200 утла участник лийын. Нуно данный да ИИ-сервис, региональный кейс полшымо дене виктарыме сомылым да кугыжаныш услугым качестваным ыштыме йодышым кугу компаний-влак дене пырля каҥашеныт.