Марий Эл Республикыште илыше пагалыме ӱдырамаш-влак!
Шошо шӱлышым пуышо, куаным кондышо, шӱмышкына шокшым да волгыдым пуртышо пайрем –Ӱдырамаш-влакын кечышт – дене Марий Эл Республикын Кугыжаныш Погынжо лӱм дене уло чонем дене саламлем.
Чыла жапыштат ӱдырамаш моторлыкым, тыныслыкым жаплыше, йоча верч азапланыше ава лийын кодеш, тудо, у шӱлышым пуртен, чон ласкалыкым пуа. Ӱдырамашлан кӧра илышын эн кугу поянлыкше: йӧратымаш, еш, чынлык – аралалт кодеш.
Еш тулотым перегыше-влак, те кызыт тӱрлӧ аланыште тыршеда. Образованийыште да тӱвыраште, медициныште да спортышто, бизнесыште да наукышто кугу сеҥымашке шуыда, политике ден мер пашаштат чолга улыда. Поро кумылым ончыктымо толкынын вияҥмаштыжат надырда моткоч кугу. Те чылалан жапым муыда, тыгодым мотор, шыма лийын кодыда.
Ныжыл ӱдырамаш-влак! Кажне кечын ыштыме пашаланда, мучашдыме чытымашланда, умылен моштымыланда, поро, шӱмдам пӧлеклаш ямде улмыланда, тӱням куан дене темен моштымыланда тау!
Тиде кечын эн сай шомакым авана-влаклан каласыме шуэш. Йочалан илышым пуаш, тудым йол ӱмбак шогалташ, тӱням умылаш туныкташ – тиде кугу деч кугу сомыл.
Таче элыштына веле огыл, республикыштынат ӱдырамаш-влак мӧҥгыштат, пашаштат шкеныштым шуарышт манын, ятыр йӧн ышталтеш.
Ава да йоча-влаклан, тыгак ешым пеҥгыдемдыме да йӱлам шуктымо шотышто шуко полыш пуалтеш. Чыла тиде Российым кызытат, ончыкыжымат виянракым ышта. Нине йодыш-влак Кугыжаныш Погынын законым лукмо пашаштат эре ончылно улыт.
Пагалыме ӱдырамаш-влак, икымше шошо пеледышын нӧргылыкшӧ дене темше 8 март пайремын юзо шӱлышыжӧ лишыл еҥда-влакын тауштымышт да йӧратымышт дене темже.
Тыланем тазалыкым, йӧратымашым, пашада вораныже да чоныштыда ласкалык озаланыже!
Марий Эл Республикысе Кугыжаныш
Погынын председательже А.В.СМИРНОВ.