«Кугарня» газетнан ВКонтакте лаштыкыштыже «Кузе иледа-шӱледа, кеҥеж пагытыште мом ыштылыда, илышыштыда могай вашталтыш уло?» йӱклымашым эртарышна да лудшына-влак деч лу ямде вашмут гыч икмыняр келшыше шонымашым ойырен налаш йодынна. Чылажге 100 утла еҥ йӱклен. Айста ончалына, кузе вашмут-влак шелалтыныт (шуко йӱкым налше вашмут гыч тӱҥалын): 1) пашаш коштына, 2) ялыште улына, 3) мӧрым, чайшудым, писте пеледышым да молымат погена, 4) монча выньыкым ямдылен шогена, 5) йӱштылаш коштына, 6) шудым ыштена, 7) вес элыште улына, 8) пӧртым чоҥена, 9) выпускнойлан ямдылалтына, 10) але марте чот тунемына. Йӱклымаш гоч коеш: канышыш лекше да пашаш коштшо-влакын чотышт икнаре. Тыгак икмыняр еҥ фото ден видео вашмутым колтен. Возымыштым шергалына.
Татьяна Тойшева, Шернур район:
– Ооо, мом гына огына ыштыл. Ялыште илена, садлан пашажат шуко: шудым ыштена, шудо деч вара Немда эҥерыш йӱштылаш куржына, пакчаште шӱкым кӱрына, вӱдым шавена, кӱтӱм кӱтена, тӱрлӧ эмшудым телылан ямдылена, мӧрым, снегым, киярым погена. Киярже гыч малосолкым ыштен кочкына. Пареҥге йыраҥыште копшаҥгым пытарена. Мӱкшым ончена, шыштым пелтена. Кидпашаланат жап уло. Фоамиран гыч тӱрлӧ пеледышым, ӱпыш резинке-влакым ыштылам.
Людмила Шамшукова, Башкортостан, Краснокам район, Пураял:
– Клубышто пашам ыштем. Кок арнялан отпускым налынам. Ты жапыште ялыштак улына, а сентябрьыште кок арнялан Абхазийыште канаш шонымашна уло. Кеҥежлан йочасадым петырышт, садлан уныкам-влак воктенемак улыт. Тыгак умбалне илыше родо-влак унала толыныт. Илена коттеджыште. Тыште икмыняр еш ила. Пакчана уло, чыла саска кушкеш. Кечым коден, эҥыжым, тӱрлӧ шоптырым, вишньым погена, нуным кылмыктена але компотым шолтена. Пытартышлан 30 атым шолтен ямдылыме. Тений кияр сайын шочын: поген да шинчалтен шукто гына! Ош Виче воктеке уныка-влак дене йӱштылаш коштына. Кожерыште поҥго погаш жап шуын. Мый поҥгыжым кочмаш уке, утларакше погаш чот йӧратем.
Галина Рублёва шке шонкалымашыж дене пайлалтеш:
– Уххх! Кенежым паша – шӱй даҥыт… Тыгак шӱкшудыжо, колорад копшаҥгыже, пормыжо, ӱвыраже витарат… А такшым, сай могыржат моткоч шуко…Кеҥ-е-е-ж!!!.
Эдуард Ильин, Кужэҥер район, Шорсола:
– Кеҥеж – телылан ямдылалтме пагыт. Ялыште илыше-шамычын эре паша. Мемнан ялыштат калык паша деч посна огеш иле. Мый теве мончам чоҥем, вӱд пучым шупшынам. Умбакыже – шудо жап. Солена, шалатена, чумырена, вӱтамбак нумал кышкена. Ушкалым ашнена, кӱтӱш коштына. Кызыт вольык ялыште шагал, кажне арнян кошташ логалеш. Каналташат жапым муына. Умбаке огына кошт, шкенан пӱртӱс моткоч мотор.
Любовь Сергеева, Морко район, Изи Кушна:
– Кеҥеж отпуск – туныктымо паша (конспект, уроклан ямдылалтмаш) деч каныш. Кеҥежым пакча, пеледыш, ужар кочкыш, шудо пагытлан шотлем. Мыйын шочмо кече пагыт!!!
Ачам – Юрий Степанович, Гена шольым дене шудым чот ыштышна. Катя, Марина, Лиза ӱдырем-влак Марий-Кужер ял гыч полшаш толыныт. Кугурак ӱдыремын университетыште сессий каен гынат, пырля пашам ышташ жапым ойырен.
