Татарстанысе Арск район Шорамучаш ялын патыр эргыже А.Михайлов – «Шишор» ансамбльын чолга участникше.
Алексейым коллективше дене пырля тӱрлӧ вере вашлияш лиеш. Теве тений июньышто «Шишор» ансамбль Морко район Изи Кушна ялыште эртарыме Семык пайрем йӱлам ончыктен. Коллектив тыгак Татарстанысе посна районышто кажне ийын эртарыме Семыкыш коштеш, сандене тудлан тиде йӱла палыме. Тыгак ансамбль кеҥежым Кужэҥер районысо «Марий Швейцарий» каныме базыште лийше «Муро памаш» фестивальыш толын каен…
А.Михайлов шкеж нерген тыгерак каласкалыш:
– Ялыштына пелыже татар, пелыже марий улына. Садлан йочасадыш кошташ тӱҥалмеке, татар йылмымат палаш тӱҥална, икте-весе дене кутырен тунемынна. Вара шкенан ялыштак школыш тунемаш пурышна. Тӱҥалтыш класслаште марла тунемна, а 5-ше класс гыч моло предметым рушла тунемаш тӱҥална. Тидын марте марий-шамыч суасла тунемыныт ыле. Туныктышына Токташ Туйбатрович Туйбатров марий-шамычым 5-ше класс гыч рушла туныктышт манын, роношко умылтараш коштын.
Токташ Туйбатрович шкеже гармоньчо, музыкант ыле. Изинекак мураш, кушташ туныктен. Йоча—шамычлан вет кушталтен муралташ пеш келша. Изиш кугурак лиймеке, пошкудо яллашке, Марий кундемыш концерт дене кошташ тӱҥална. Южгунам Озаҥ олашкат иктаж-могай мероприятийлашке ӱжыктат ыле. 30 августышто Татарстан Республикын пайремыштыжат Озаҥ олан Рӱдӧ стадионыштыжо выступатленна. Татарстанын икымше президентше Минтимер Шаймиеват выступатлымынам ончен шоген да мемнан деке толын мокталтен ыле. А икана Арскыш сайлымаш деч ончыч Борис Ельцин толын, Тунам районна Сабантуйым эртарен.
Коллективна «Шишор» лӱман. Ожно мемнан ялна тыге маналтын. «Шишор» ансамбльын икымше вуйлатышыже Токташ Туйбатровичак лийын. Вара тудым тукым изам Бронислав Михайлович Михайлов алмаштен. Кызыт ансамбльым марий йылмым туныктышо Олеся Игоревна Антипова вуйлата. Тыгак ты чолга ӱдырамаш – Арск районысо марий-влакын национально-культурный автономийыштын председательже.
Школым тунем пытарымеке, Озаҥыш каенам. Тушто химико-технологический колледжыште компрессорный да насосный установкын машинистшылан тунемынам. Вара Озаҥысе химико-технологический университетыште «Машины и аппараты химических производств» специальность дене – инженерлан.
Но тыгодымат ансамбль дене кылым йомдарен омыл. Сабантуйышто, «Древо жизни», «Марийская радуга» да моло пайремыштат выступатленам. Татарстанысе Калык-влакын келшымаш пӧртыштышт лийше мероприятийыш кошташак тыршем.
А.Михайлов тӱрлӧ вере пашам ыштен: икмыняр заводым чоҥымаштат, тудын кӧргыштыжат тыршен, Йӱдвелышкат командировко дене коштын. Кызыт Алексей 68 ияш ачаж дене пырля ила. Жаплан Арскышке пашаш пуренам мане. ЧПУ (Числовой программный управлений) операторлан пашам ышта.
Каласыман: кодшо ийын марий пӧръеҥ Йӱдвел дене кылдалтше Мурманск олан эртарыме «PhotoИней» конкурсышко ушнен да «Пейзаж фото» номинацийыште «Новый Уренгой» фотокартычкыж дене Гран-прим сеҥен налын.
«Фотом пашаште, чодыра коклаште ыштыме. Ме вет цивилизаций деч ӧрдыжтӧ пашам ыштенна, вертолёт дене гына тушко чоҥештенна. Ик рейс годым саде фотом ыштенам. Интернетыште фотоконкурс нерген ужынам да колтенам ыле», – манеш Алексей.
Эльвира Терентьева.