Марий Элыштына 18 загс пӧлка уло. Нуно кажне район ден ола администраций пелен тыршат да тӱрлӧ услугым пуат. Тыгак ик эн тӱҥ семын Марий Эл Республикысе Элгӧргӧ политике, верысе самоуправленийым вияҥдыме да юстиций министерстве пелен загс пӧлка пашам ышта.
Теве Советский районышто загс пӧлкаште Елена Васильевна Рязанова 2006 ий годсек тырша, а 2013 ий годсек – вуйлатышылан. 2013 ий годсекак советник сомылым Ольга Александровна Габдуллина шукта.
Советский районышто марий ял шуко гынат, тений да тылеч ончычат загсыште марла возалташ кумыланже лийын огыл. Тений 15 декабрь марте тыште 102 мужыр пырля илаш тӱҥалме шотышто документым налын, шукышт сӱаным эртареныт. Тыгодым марий сӱан вургем дене толшо-влак тӱмырым кыреныт, гармоньым шоктеныт да марий мурым йоҥгалтареныт. Елена Васильевнан мутшо почеш, тыгайже чумыр сӱан деч иктаж 10 процентше лиешат.
2024 ийыште 15 декабрь марте 136 аза шочмо нерген свидетельствым кучыктымо. Ӱдыр ден эрге-влакын чотышт огеш ойыртемалт: 67 ӱдыр ден 69 эрге.
Тений Советский районышто утларакшым шке йочаштым Артём, Михаил, Матвей, Александр, Анна, София, Виктория манын лӱмденыт. Тыште (да моло вереат, очыни) кажне гана ача-ава-влак лӱмым пуымо шотышто ум да оҥайым шонен луктыт. Теве Советский районышто 2024 ийыште шуэн вашлиялтше лӱман-влак шагал огытыл. Ача-ава-шамыч ньогаштым Аарон, Амелия, Есения, Элиана, Платон, Ведана, Ариела, Рафаэль, Марселина, Аврора, Захар, Ян, Гордей манын лӱмденыт.
Е.В.Рязанова загс пӧлка ятыр мероприятийым эртара манын палемдыш. Кодшо арнян «Моя семья» клуб икымше погынымашыш чумырген. Ондакше клуб лийын, но пашам ыштымым чарнен. Ты гана шуко шочшан еш-влакым ӱжыныт да нунылан полшымо шотышто каҥашеныт. Тыгай вашлиймашым эре эртараш палемденыт.
Эльвира Терентьева.
Снимкыште: Е.Рязанова ден О.Габдуллина.
Фотом еш альбом гыч налме.