6 августышто «Самырык-влакын этно-лабораторий» проектын икымше ужашыже мучашлалтын. Арня жапыште Т.Евсеев лӱмеш тоштерын кум пашаеҥже да индеш волонтёржо Морко районыш этнографий экспедиций дене лектын коштыныт. Проектым Росмолодёжын полшымыжо дене тиде паша шукталт кертын. Тоштерын этнографий отделын кугырак шанче пашаенже Надежда Васканова черетан грантым сеҥен налын.
XX курымын 20—шо ийлаштыже Тимофей Евсеев кугу марий тӱр коллекцийым поген. Тудлан Азъял, Волаксола да Весшӱргӧ яллаште илыше 10 ургызо тӱрым тӱрлаш полшен. Поян материал кызыт Хельсинкиште Финн калыкле тоштерын да Российысе этнографий тоштерын фондлаштыше аралалтыт.
Этно-лабораторийын участникше-влак нине тӱрлызӧ-влакын илыш-корныштым пален налаш, родо-тукымышт дене палыме лияш шонымаш дене коштыныт. Чыла шонымо семын лийын. Тӱрлызӧ-влакын родо-тукымышт дене палыме лийын, нунын деч родыштын пӱрымашыштым, койыш-шоктышыштым возен кодымо. Тыгак еш альбом гыч возен налме фото-влакат шерге улыт. Тоштерын фотоархивше кум ургызын фотошт дене пойдаралтын.
Волонтёр коклаште сӱретче Алёна Фёдорова лийын. Тудо марий тӱрлан да ялласе уремламлан этюдым, эскизым, зарисовкым ыштен.
Тимофей Евсевын уныкашт Надежда Васильевна ден Светлана Васильевна Евсеевмыт кочашт нерген шарналтен, самырык шымлызе-влаклан ешартыш материалым пуышт.
Этно-лабораторийын волонтёржо-влак яллаш лектын, верысе калык дечын этнографий сынан 80 утла тӱрлӧ арверым погеныт. Марий телевиденийыште этно-лабораторий нерген уверым колын, Весшӱргӧ ялыште илыше Маргарита Степановна Степанова экспедицийын участникше-влакым вученак шоген. Тудо мешак дене марий тувырым да вуйчиемым луктын пӧлеклен.
Самырык-влакын этно-лабораторийже умбакыже пашам шукта. Кызыт погымо материалым архивын данныйже почеш таҥастарыме паша кая. Тыгак Т.Евсеев лӱмеш тоштерым пӧлеклыме арверым фондыш пуымо деч ончыч шотыш кондат.
Ончылно ончерлан да электрон каталогым ямдылыме паша вуча.