Шымше созыв Кугыжаныш Погынын депутатше-влак 2020 ийлан пытартыш латвизымше сессийыште Марий Элын Конституцийышкыже вашталтышым пуртымо шотышто йӱкленыт.
Тӱҥ документым уэмдыме, Россий Конституцийлан келыштарыме, но тудым эше депутат-влак кокымшо лудмаште ончышаш улыт. 29 декабрьыште эртыше сессийыште 12 йодышым ончымо. Иктыже чодырам ойырымо дене кылдалтын. Илыме верым чоҥаш еҥ-влаклан але марте 150 кубометр марте чодыра ойыралтын. Но пӧртым чоҥаш 80-85 кубометрат сита манын палемдат. Сандене 100 кубометр марте пуаш ыштыме.
Депутат-влак кок суд участкышке мировой судьям ойыреныт. Марий парламент кок депутатлан шагалемын: А.Карташов жап деч ончыч полномочийым кораҥдаш йодын, В.Севастьянов шукерте огыл илыш гыч каен.