Тений кеҥежым Республикысе изосымыктыш тоштерыште «Большая Волга ХIII. Культурный код народов Поволжья» ончерыште самырык сӱретче Ольга Ермилован пашажым ужын, авторым философий шӱлышан сӱретче манын шоналтенам ыле. Тунамак тудын нерген утларак пален налаш да моло пашажымат ончалаш кумыл шочын.
Каласыман: О.В.Ермилова Россий художник ушемыште 2018 ий годсек шога. А кугу ончерыш логалмыже – шкешотан сеҥымашыже. Тидыже мастар улмыжым пеҥгыдемда.
«Лудо дене натюрмортышто» ончыктымо ӱстембал, арвер-влакат, чылажат воктенет верланышыла коеш. Шола могырышто мотор ава лудо шке лудигыж дене ковыртатен шогылтеш. Чукырыш пыштыме кофем кеч кызытак подыл колто. Мыланем, шке йоҥыштымо кофем шолтен йӱшӧ еҥлан, волгыдо тӱсан тиде радына лишыл лие.
– Ольга, натюрмортышто ондак мом кузе да кушко вераҥдаш кугу фантазий кӱлеш, вара гына шарналт кодшо паша лектеш. Тиде картиныда кузерак шочын? Тудым финн-угор калык дене кылденда мо?
– Тыште мый индонезийский декоративный лудым ужынам, сандене тусо тӱвырам, ешын да йӧратымашын символыштым ончыктенам. Кофе, экзотике, Индонезий… Палем, марий калыкын мифологийыштыже ава лудо тӱням шочыктымо дене кылдалтеш. Сандене лӱмжым марий калыклан лишыл кайыквусо дене пуэнам. Шеҥгелныже тыглай куэм гай огыл, илыш але йомак тӱня семын койжо манын тыршенам. Тиде мыйын шонымашем.
Ты картиным кок тылзыште уло кумылын сӱретленам. Но шонымашыжым, образ-влакым ятыр жап шке вуйыштем «коштыктенам». Вет натюрмортлан эн ончыч сюжетым шочыктет, келшыше арверым, куэмым кычалат, фигурко-влакым шындыл ончет, келыштарет, вара гына карандаш ден чиям кидышке кучет.
– Палем, Те Йошкар-Оласе художественный училищыште «Живопись» предметым туныктеда.
– Тиде ешартыш пашам гына, а тӱҥ пашамже Национальный художественный галерейыште. Тушто 2019 ий годсек йоча ден кугыеҥ-шамычлан «Пейзаж» студийыште сӱретлаш туныктем. Тений кумылан-шамыч ятырак улыт, вет сӱретлымаш шӱм-чоным лыпландараш полша, куандара.
Йошкар-Олаште шочын-кушкынам, Йошкар-Оласе 1-ше номеран художественный школышко куржталыштынам. Тушто живописьлан Иван Фёдорович Исаков кумылаҥден. Варажым Йошкар-Оласе художественный училищым, Яковлев лӱмеш Чуваш кугыжаныш педуниверситетым тунем пытаренам.
Умбакыже — 20 октябрьыште лекше «Кугарня» газетыште.
Фото-влакым О.Ермилова пуэн.
