Юлсер федерал округын эртарыме «ФормART» фестивальын ойырымо (отборочный) этапшын сеҥышыже-влак палыме улыт. Ойырымаш 1 апрель гыч 10 июнь марте эртен. 14 регион гыч 157 йодмаш пурен. Участник-влак 18-35 ийготан лийыныт. Марий Эл гыч ик эн сай пашалан Илья Беловын «Шарнымаш» («Воспоминание») проектшым шотленыт. Рвезын граффитиже П.И.Чайковский лӱмеш сымыктыш школын тӱжвал тӱсшым сӧрастараш тӱҥалеш. Ушештарена, Илья Белов кодшо ийын тиде окружной фестивальыште «Лӱҥгалтыш дене» («На качелях») граффити дене кокымшо верым налын.
Стрит-арт проект ынде кумшо ий Юлсер федерал округышто РФ Президентын представительже Игорь Комаровын темлымыж почеш эртаралтеш.
Тиде ийын фестиваль Российысе калык-влакын тӱвыра поянлыкыштым почын пуа.
Стрит-арт фестивальын финалистше-влак Юлсер кундемын регионлаштыже шке сӱретыштым палемдыме зданийын пырдыжышкыже вераҥдат. Сӱретлымышт годым нуным видеош да фотош войзат да проектын сайтышкыже вераҥдат. Вара тушто йӱклымашым почыт. Сеҥыше-влаклан усталыкыштым шуараш 100-200 тӱжем теҥге оксам пуат.
