Сылнын шокталта, мастарын кушталта

Тиде рвезе чатка капкылан, лывырге кид-йолан. 16 ияш гына, а усталыкше, мастарлыкше мучашдыме. Палыме лийза: Оршанке район Пуял ялеш шочын-кушшо, Марий радиомеханический техникумышто икымше курсышто техник-механик направлений дене тунемше Андрей Ефремов. Рвезе МарГУ-со «Марий мурсем» ансамбльыш коштеш, гармоньым шокта.

Изинек чулым

Андрейын чолгалыкше чыла вере палдырна. Тудо марий йылмым, тӱвырам аклыше да йӧратыше рвезе.

Кугунур школышто «нылытан» да «визытан» отметкылан гына тунемынам. Икымше гыч индешымше класс марте школ деч вара арнялан кок гана «Шонанпыл» образцовый фольклор ансамбльыш коштынам. Лариса Евгеньевна Акулова кушташ туныктен гын, Елена Сергеевна Рыбакова – мураш. Оршанке кундемнан чапшым тӱрлӧ конкурс ден мероприятийыште араленна. Ик эн волгыдо шарнымаш – тиде «Михаил Мурашко приглашает друзей» конкурс-фестиваль. Эстон да удмурт куштымаш-влакым ончыктенна да кокымшо степенян лауреат лийынна, – палемда А.Ефремов.

Чолга студент

Андрей студент пагытшымат веселан да пайдалын эртара. Мутлан, 2023 ий ноябрьыште «Алло, мы ищем таланты» конкурсыш Никита Козлов дене пырля ушнен. Жюри нуным кӱкшын аклен да икымше верым пуэн. А.Ефремов ӱмаште сентябрьыште «Марий мурсем» ансамбльыш ушнен.

«Марий мурсемыш» мыйым йолташем ӱжын. Тыште участник-влак чыланат марий улыт. МарГУ гыч веле огыл, моло тунемме вер гычат ӱдыр-рвезе-шамыч коштыт. Арнялан кок гана погынена. Родион Сергеевич Алексеев мураш туныкта, Василий Евгеньевич Кириллов тӱрлӧ куштымашым шында.

Шукерте огыл ансамбль дене Морко район Кугу Шале, Унчо яллаш да Коркатово лицейыш выступатлаш миенна. Тӱрлӧ куштымашым ончыктенна, муро-влакым шергылтаренна. Никита Козлов дене пырля гармонь почеш такмак-влакым муренна.

Никита йолташем дене тыгак Йошкар-Олаште Сеҥымашын ХХХ идалыкше лӱмеш тӱвыра полатыште гармоньчо-влакын «Играй, новогодняя гармонь» фестивальыштышт участвоватленнна, марий семым шоктенна.

Тӱрлӧ кундем гыч толшо калык коклаште шке моштымашым ончыкташ, у еҥ дене палыме лияш, сценыште гармонь дене шокташ мыланем моткоч келша. Тиде вийым пуа, кумылым нӧлта, – ойла гармоньчо.

«Гармоньым шокташ кушто тунемынат?» йодышлан Андрей тыге вашештыш:

Мӧҥгыштына ачамын чӱчӱжын тошто гармоньжо ыле. Ешыштына тудым иктат кидыш налын огыл, сандене ик ий ончыч шке гыч интернетысе видео-влак почеш шокташ тӱҥалынам. Видеом ончен, парня-влакым кӱлеш вере шындаш тунемынам. Тӱҥалтыште кок кид дене иканаште паҥгалам темдаш нелын чучын. Но пел ий наре шуаралтмек, шот лектын. Ончыкыжым гитарым шокташ кумылем уло.

Андрейлан тыгаяк чолга кодаш да шонымашке шуаш тыланена.