Сылнын лудшо-влакым палемдыме

Д.Веденькин, А.Милютин, А. Алексеев

8 апрельыште Йошкар-Оласе йоча да самырык-влакын усталык полатыштышт «Живая классика» Российысе конкурсын регионысо йыжыҥже эртаралтын. Тушко районлаште сеҥышыш лекше 47 тунемше ушнен.

Нуно Российысе, йотэлысе, тыгак марий классик-влакын произведенийышт гыч ужашым сылнын лудыныт.

Марий писатель-влакын произведенийышт гыч ужашлам сылнын лудмаште Кужэҥер районысо Шорсола школышто 7-ше классыште тунемше Александр Милютин, Совет Ушем Герой А.М.Яналов лӱмеш Шернур посёлкысо 1-ше номеран школышто 11-ше классыште тунемше Дмитрий Веденькин, Морко посёлкысо 1-ше номеран школышто тунемше Антон Алексеев сеҥеныт.

Рушла дене сылнын лудмаште Козьмодемьянскысе лицейыште тунемше-влак Полина Каткова (10-шо класс) Ульяна Галибина (6-шо класс), Морко район Коркатово лицейыште 11-ше классыште тунемше Кристина Краснова ойыртемалтыныт.

Конкурсын финалже «Артек» тӱнямбал йоча рӱдерыште лиеш. Тушто рушла  сылнын лудмаште сеҥышыш лекше-влак мастарлыкыштым ончыкташ тӱҥалыт.

Кужэҥер район Шорсола школышто 7-ше классыште тунемше Александр Милютин (снимкыште покшелне) Российысе тыгай конкурсыш кажне ийын ушна. А тений тудо регионысо йыжыҥыште икымше гана сеҥышыш лектын. Рвезын усталыкше нерген акаже, Марий Эл Республикысе Калык усталык да культурканыш паша шотышто республикысе шанче-методике рӱдерын хореографий шотышто методистше Мария Тимиряева, тыгерак ойлыш:

– Саша ныл ияшак лудаш тунемын. Кеч-могай почеламутым,  прозым моткоч писын шарнен кодеш. Конкурслан Шорсола школышто марий йылмым да литературым туныктышо Алевтина Максимовна Барабанщикова дене пырля ямдылалтыныт. Регионысо кӱкшытыштӧ Александр Юзыкайнын «Пеледышан мӧр» произведенийжым сылнын лудын. 9 апрельыште тудо тыгак Кужэҥер районысо «Душа полна благодаренья» почеламутым лудмо конкурсышто Гран-прим налын.

Рвезе театр пашалан кумылан. Кажне каныш кечын Йошкар-Олашке «Воштончыш» музыкально-драматический театрын репетицийышкыже кудалыштеш. 17-19 апрельыште «Каскад» фестивальыште нуно «Токтар патыр» спектакльым ончыктат. Александр тушто тӱҥ рольым модеш.