Сылнын, куатлын эртен

И.Речкинын фотожо.

«Кугарня» газет редакций Йӧратымаш кече вашеш «Йӧратымашын уло юзо вий» концертым 15-ше гана эртарен да газетым лудшо-влакым иктеш чумырен. Тений тудо 10 февральыште М.Шкетан лӱмеш Марий драмтеатрыште лие.

Тыгай шотан концерт-влак икте-весе коклаште кылым утларак пеҥгыдемдаш, газетым утларак налаш кумылаҥдаш, марий мурызо-влак дене лишкырак палыме лияш полшат. Ты гана ретро муро-шамычат йоҥгалтыч.

Марий мурым йӧратыше-влак шукын улыт. Сандене театрыште калык зал тич погынен ыле. Концертыште палыме артист, мурызо-влак Олег Логинов, Иван Смирнов, Зоя Берникова, Роза Искакова, Эльвира Трифонова, Светлана Осипова, Володя Матвеев, Алексей Юнусов, Любовь Орлова да молат муреныт. Репертуар поян лийын. Чылаже 32 номер дене калыкым куандарыме. Концертым М.Шкетан лӱмеш театрын артистше-влак Марина Воронцова ден Иван Соловьёв вӱденыт.

Концерт куатлын, сылнын эртен. Виян йӱкан мурызо-влакым колышташ шукылан куанле ыле. Йӧратымаш нерген тӱрлӧ сынан муро-влак йоҥгалтыч. Южыштым икымше гана калык коклашке лукмо.

Антракт жапыште кокымшо пачашысе фойеште ончаш толшо-влакым марий сем почеш куштыктымо. Ончышо-влак мурызо-шамыч дене пырля йоҥгалтереныт.

Билетым налше-влак коклаште розыгрышым эртарыме. «Мари сийгудыш» сертификатым, Шкетан лӱмеш да Марий самырык театрлаш каяш кок еҥлан ӱжмаш-влакым кучыктымо. Тыгак марий тувырым чиен толшо-шамычлан посна пӧлекым пуымо.

Концертлан сценарийым «Кугарня» газетын тӱҥ редакторжо Ирина Степанова возен. Театр гыч шукын куаныше шӱргывылышан, весела кумылан каеныт. Тугеже эртарыме пайремна шуко еҥлан шарналт кодеш да ончыкыжымат тышке толаш кумылым луктеш манын ӱшанена.

В.Шабдаров ден З.Берникова.
Т.Степанова ден С.Пчёлкин.

Концертыш Шернур район Рушэҥер ял гыч Светлана Пайбаршева толын. Тудо Казанский селасе школым вуйлата, руш йылмым да литературым туныкта. Концерт нерген тыге мане:

– Советский посёлко гыч йолташ ӱдырем концертыш каяш ойым пуыш. Билетым ончылгоч налынна да концертыш куанен толынна. Пеленем тыгак акамым конденам.

Чоным куандарыше концерт лие. Уло кертмын совым кырышна.

Сценарийым оҥайын, сайын возымо, вӱдышӧ-влакат кумылым нӧлтеныт. Олег Логиновын йӱкшӧ мылам эн чот келшен. Тыгак Геннадий Васильев ден Таисия Смирнова ойыртемалтыныт. Коктынат мыланем палыдыме улыт гынат, мурымышт чонеш логалыныт. Сценыште шкем тыматлын кучен моштат. Нуным эсогыл кокымшо гана сценыш лекташ ӱжыныт. Концерт деч вара чонлан сайын чучеш, илымет шуэш. Вес ийынат толаш кумыл уло.

 Шернур район Мустай ялеш шочын-кушшо, кызыт Йошкар-Олаште Марий машиностроительный заводышто пашам ыштыше Снежана Кузьминых:

– «Кугарня» газетын чумырымо концертышкыже икымше гана толынам. Пеш сайын эртен. Кумыл нӧлталтын. Мурызо, артист-влак кокла гыч эн чот Олег Логинов келшен. Тудо пеш виян йӱкан. Роза Искакован мурымыжым колыштын, профессионализм шӱлышым шижым. Вӱдышӧ-шамычат мастар улыт, шке пашаштым сайын шуктат, калыкым савырен моштат. Нине артист-влакын модмо спектакльыштым чӱчкыдын ончаш коштам.

Ты гана йолташ ӱдырем дене толынам, вес гана пеленем пелашем кондаш шонем.