
Декабрь тӱҥалтыште «Добро не уходит на каникулы» Российысе конкурсын сеҥышыже-влак элнан рӱдолшкыже миен-коштыныт. Ӱдыр-рвезе-шамыч школысо доброволец-влак командын форумыштышт участвоватленыт. Нунын коклаште Морко районысо Кокласола лицейын 10-шо кадет классыштыже тунемше Татьяна Суворова лийын.
Ӱдыр Кожлаер ялыште шочын-кушкын. Сай шинчымашым налаш, чолгалыкшым тапташ манын, Кокласола лицейыш тунемаш пурен. Тидын нерген Татьяна тыгерак палдарыш:
– Лицейыште мыланем тунемаш оҥай. Тыште кундемнан тӱрлӧ луклаж гыч сайын тунемше ӱдыр-рвезе-шамыч шинчымашыштым пойдарат. Тидыже мыланна моштымашнам нӧлтымаште, ум пален налмаште, уш-акылнам пойдарымаште сайынак полша. Молан манаш гын, икте-весыланна вияҥаш, кушкаш йӧным ыштена.
Обществознаний предмет моткоч келша. Садланак кӧра кадет классыште тунемам. Тыгак марий йылмылан шӱман улам. Тӱрлӧ конкурслашке, олимпиадылашке кумылын ушнем. Сеҥыше-влак коклаште чӱчкыдын лектам, тидыже шкешотан вийым да куаным ешара, умбакыже тыршаш, тунемаш кумылым луктеш.
Яра жапем лийме годым сылнымутлан жапым ойыраш тыршем. Лудаш, почеламутым тунемаш йӧратем. Садланак поэзий конкурслаштат чӱчкыдын вием тергем.
Татьяна, чынжымак, сылнымут конкурслаште шукыж годым сеҥышыш лектеш. Ӱдырын поэзийым шижын моштымыжым, корныла-влакым чон вошт колтымыжым ятыр чаптанык-влак пеҥгыдемдат.
– Эше изи улмем годымак, авам ты мастарлыкем шижын шуктен. Тыге тудын дене пырля почеламутым тунемаш да калык ончылно йоҥгалтараш тӱҥалынам. Сценыш лекмем годым уто тургыжланымашым, ӧрмашым, лӱдмашым йӧршынат ом шиж. Пуйто мый шкет улам да уло тӱнялан сылнымут корнылам пӧлеклем.
Варажым тидым Нина Вениаминовна Аркадьевна шекланен да туныктышо, наставник семын профессионал полышым пуэн. Тудо ты мастарлыкем эшеат вияҥдымаште, пеҥгыдемдымаште кугу надырым пыштен, – мане Т.Суворова.
Москошто форумышто
Эртыше идалыкын пытартыш тылзынже сылнымутлан шӱман Суворова да тудын йолташ ӱдыржӧ Анна Чугунова Москошто эртаралтше «Добро не уходит на каникулы» форумыш миен-коштыныт. Нунын дене пырля класс вуйлатышышт Валентина Николаевна Васильева лийын. Форум нерген ӱдыр тыгерак шарналтыш:
– Ты форум чонышто келге кышам коден. Тушто кажне кече событий-влаклан поян лийын. Тидыже у эмоций, шижмаш, тӱҥжӧ – шинчымашым пойдарымаш.
Форумыш кугу элнан тӱрлӧ регионлаж гыч чолга ӱдыр-рвезе-шамыч толыныт. Нуно шке опытышт дене палдареныт. Тыгак виян спикер-влак дене тӱрлӧ вашлиймаш, мероприятий эртаралтыныт. Тушто шуко ум пален налынам, ятыр иктешлымашым шканем ыштенам. Ончыкыжым нуно иктаж шонымашем илышыш шыҥдарымаште сайын полшат шонем.
Чынжымак, кызытсе чолга ӱдыр-рвезе-шамычлан вияҥашышт ятыр корным почмо. Тидыжым тӱрлӧ форумыш, конкурсыш, мероприятийыш ушнен ышташ лиеш. Тидланже уш-акылым пойдарыман, жапым пайдалын эртарыман. Садланак тыгай жап лийме годым Татьяна книгам лудеш, шинчымашыжым пойдара.
Ӱдырын альбомжо гыч налме фото.