Ме чыланат шке шочмо йылмынам йӧратена. Садланак «Марий сылнымут садвечыште» кружокыш коштына. А шукерте огыл кружокнан вич эн чолга тунемшыжым Йошкар-Олашке «Сылнымут шыже-2023» семинарыш ӱжыныт.
Мыланна тушто пеш чот келшен. Ме «Прозо» секцийыште шке чолгалыкнам ончыктенна. Ий гыч ийыш сай пашам шуктен толмыланна, газет-влак дене пеҥгыде кылым кучен шогымыланна мемнам чапкагаз дене палемденыт. Надежда Сергеева «Россий салтак» почеламутым йоҥгалтарен. Мый, кружокын старостыже семын, «Марий сылнымут садвечыште» кружокна нерген каласкалышым.
«Сылнымут шыже-2023» республик кӱкшытан семинар мемнам ятырлан туныктен. Шуко марий писатель ден поэт-влак дене палыме лийын кутыренна. Мый чыла тунемшына-влак лӱм дене кружок вуйлатыше Елена Валериановна Григорьевалан да Марий Эл Республикысе писатель ушем вуйлатыше Светлана Дмитриевна Архиповалан пеш кугу таум каласем.
Анна Анисимова.
Моркр район, Шӱргыял школ.
