17-19 сентябрьыште Самара кундемыште Михаил Анищенко лӱмеш сылнымут фестиваль лийын. Тышке Российын турлӧ кундемлаж гыч самырык возышо-влак погыненыт. Фестиваль Россий пистель ушем пеленысе самырык сылнымутчо-влак советын полшымыж дене тений индешымше гана эртаралтын.
Мероприятий Самара кундемысе областной книгагудышто уста поэт, прозаик, журналист М.Анищенкон возымо пашаже-влаклан келыштарыме сӱрет ончер да почеламут лудмаш дене тӱналын. Умбакыже учатник-влак Зольное села воктене верланшые «Жигули» рӱдерыште погыненыт.
Вашлиймаш семинар семын эртен. Самырык возышо-влак конкурсыш ончылгочак йодмашым возеныт, шке пашаштым эксперт-влаклан аклаш колтеныт. 430 утла сылнымут паша лийын, эн ойыртемалтше 70 утла автор погынен. Участник-влак икте-весыштын произведенийыштым эше тышке толмо деч ончычак лудыныт, аклаш ямдылалтыныт.
Кум кече жапыште ӱдыр-рвезе-влак икмыняр тӱшка дене пашам ыштеныт: прозо, поэзий (йоча да кугыеҥ-влаклан), тыгак сылнымут пашам вияндымаште тыршымаш (организатор-влак). Кажне тӱшкаште эксперт-влак лийыныт, самырык автор-шамычын возымо пашаштышт улшо ситыдымашыт лончыленыт, мастарын возаш манын, мом шотыш налаш кӱлмым умылтареныт, тачысе сылнымутын проблемыже шотышто каҥашеныт. Тылеч посна спикер-влак сылнымут мероприятийым эртарыме проект-влакым акленыт, нуным радамлаш полшеныт. Ты секцийыште «Кугарня» газетын пашаеҥже да самырык поэт-влак Алёна Яковлева ден Надежда Эмыкан лийыныт, кызытсе сылнымутым вияҥдыме сомылым каҥашеныт.
Семинарын участникше-влак сылнымут турнирыште мастарлыкыштым ончыктеныт, почеламутым, прозым лудыныт, тыгак Жигулёвский заповедникыште верланыше Стрельный курыкыш экскурсий дене миеныт.
Фестивальыште кажне гана эн тале возышо-влакын лӱмыштым палемдат, икмынярлан книгам савыкташ темлат, Россий пистель ушемыш пуртышаш автор-влакым палдарат да эн чапле проектым илышыш пурташ кӱлмӧ шотышто темлымашым пуат. Тыгак посна регионлаште самырык сылнымутчо-влакын советыштым ышташ кулмӧ нерген пунчалым луктыт.