Николай Золотарёв
Йоча жапна
Йоча жапна, чарен зиян деч,
Рÿза парняжым кызытат.
Пеш кертынна конден куаным,
Кунамже – шинчавÿдымат.
Сÿретлалтеш тунамсе пагыт.
Ужат: шога изи малай.
Ачажын портышкем чапаште,
А упш – пыжашлык малахай.
Коклан ыштенна кÿлдымашым.
Верештын сайынак тидлан.
Пален онал йöршеш лÿдмашым,
Ок пале лÿдмым хулиган.
Изи пуш лийын тошто камер,
А ме гын – лÿддымö матрос.
Ушкалын кошкышо кышаж гыч
Шупшашна лийын папирос.
Йоча ушна ыштен ÿзгарым,
Могайлан öрын инженер.
Кленча, калай, шÿкшÿ оҥа гыч
Чоҥен ракетым пионер.
Кок армийлан шелалтын, тазым
Лочкенна пулемёт олмеш,
Пуракым вÿдылын кагазыш,
Кышкенна «немыч» ваштареш.
Лиялтын йоҥылыш «пожарник»:
Коденыт утарен вÿтам;
Изиш кушмекына – пожарный:
Туллан ышна пу шем мончам.
Шеҥаш пурен онал йыраҥыш,
Кеч еҥын тамле ман ойлат.
Чевер олмам, шуан киярым
Темленна икте-весылан.
Пырт веле койын ÿжарала,
Чыменна вÿд воктек эрден.
Чарга йÿкнам колмек, тора гыч,
Киен олаҥге чытырен.
Паленна, мо тугае ÿҥгö,
Моштенна ойырен тумнам.
Аяр ден темше пундыштÿНым
Пыштен онал куршышкына.
Пален онал ия деч лÿдмым,
Пален онал вуверымат.
Пуаш кÿлеш ыле чаплÿмым –
«Пÿртÿс науко кандидат».
Кеч кочкашат шагал логалын,
У тумышым вучен йолаш,
Книгала илышым шергалын,
Ок лий шукертсым пöртылташ.
Людмила Очеева
Куан
Куан, кунам эрдене эрак
Шып кынелам, кочкаш ыштем.
Вара вÿчкен-вÿчкен ешемым,
Эр тутло кочкыш ден сийлем.
Куан, кунам каем чодырашке,
Оҥ тичак южым шÿлалтем…
Вара леҥежым лач тÿргочын
Чодырасе емыж ден темем.
Куан, кунам шочшем-влак толыт.
Коҥгаш мелнам мый кÿэштам.
Кунам родем-влак, погыналын,
Кутыралтен, мурен колтат.
Куан куалтын кечыйол ден,
Тÿрлалтын, тÿрлö тÿсым авалтен!
Куанын йÿкшö – уныкамын,
Вет тудым колын куанем.
Аэлита Бычкова
Аклыза
Шке жапыште ме она акле родым,
Она чамане улшым воктенна.
Каен колта… Шарналтена ме порым
Да, шортын, умбал корныш колтена.
Ок пӧртыл нигунам ынде айдеме,
Ок лий мемнан пелен ик кечымат.
Каваште тудын чон ынде пореме…
Но от керт шып кучен тый кидшымат.
Тый нигунам от уж тетла шинчажым,
От керт чонетым почын кутырен,
От кол тый тудын дечын ой-каҥашым,
Воктекыжат от керт ласкан пызнен.
Чаманыза воктен улшо айдемым,
Ида вашке сырен вурседылаш,
Чот аклыза пырля лиялме кечым
Амал ок лий варажым ӧкынаш.
Нина Щербакова
Йолташем, омем мыйын уке
Ял мучаште шкетын ош куэ,
Лывырген, укшлажым модыкта.
Йолташем, омем мыйын уке –
Лектым куэ дек, чонем лушка.
Йыл-йыл койын, верым алмаштен,
Йÿд каваште тылзе йылгыжеш.
Йолташем, омем мыйын уке –
Шÿдыр гай чонемже чолгыжеш…
Кас юалге. Сер воктен шогем,
Шыматен, мардежше пуалеш.
Йолташем, омем мыйын уке –
Толкын ден саламым мый колтем…
Лончылен, оет нерген шонем,
Сылне чурий-сыным сÿретлен.
Йолташем, омем мыйын уке –
Пöртыл, йöратен алят вучем!
Надежда Ильина
Шокшын чучеш
Марий мурым колам да чонемлан
Моткоч куштылгын, шокшын чучеш.
Тек тауштымо мут шÿмбелемлан
Йоҥгалтеш, илаш корным почеш.
Ала тиде мылам шочшо муро,
Ала ныжыл сем йоҥгыш тылат.
Шем рокеш мурын семжым от уро…
Тыят муро гай икте кÿлат.
Марий муро наҥгайыш торашке,
Ушем самырык жапыш куржеш.
Сÿретлаш эн сöралжым ом вашке,
Чоным волгыдо кумыл туржеш.
У ий толеш!
Шарабуева Ксения.
Шернур район, Мари Кугунур
Куан тул
– У ий ден! У ий ден! –
Марий калык йывыртен.
Кушталта да муралта,
Кож йыр пöрдын савырна.
Изижат да кугужат
Маскарадыш чумыргат.
Кö мераҥ лиеш, маска,
Пире, рывыж, я каза…
Кажнын кумыл весела,
Мурым муралтат марла.
Пайрем шÿлышым пурташ,
Кугызам кÿлеш ÿжаш!
– Йÿштö, Йÿштö Кугыза!
Пеш чот тыйым вучена:
Кожын тÿсшым чеверташ,
Пайремнам сöрастараш!
Лум лумеш, поран лÿшка,
Йÿштö Кугыза вашка
Пöлек-влакым пуэдаш,
У ий дене саламлаш!
Яна Глушкова, Руш Лажмарий
***
Теле Элышке вашка,
Лумым курык нар конда.
Пÿртÿсат йырваш ошемын,
Пуйто йÿштö дечын шылын.
Ош кисала лум пöрдеш,
Ерыште ий чолгыжеш.
Теле ден У ий толеш,
Ешыште пиал шолеш!
Анна Орлова.
Шернур район, Шÿдымарий школ
У ий толеш!
Декабрь окнашке пералта,
Мемнам уремышке кÿшта.
Модаш, лум валне почаҥаш
Да ече дене мунчалташ.
Поран уремыште лÿшка,
Ош мамыкым йырваш кышка,
Эрдене эр йоча тÿшка
Лум курыкышто мунчалта.
А йÿдым Йÿштö Кугыза
Ял мучко эркын савырна,
Окна яндаш тамгам воза,
Мемнам У ий ден саламла.
Эн сылне-сылне кожым мый
Ший модыш ден сöрастарем,
Эше мотор ший шÿдырым
Кож вуйышко мый пижыктем.
У ий ден саламлем тÿням
Да уло чон ден тыланем:
Пиалым, эрыкым, ласкам…
Ила тек кажне куанен!
Полина Максимова.
Параньга район, Матародо школ.
Йÿштö Кугыза
Поро Йÿштö Кугыза
Окнаш толын пералта.
У ий дене саламлаш
Мемнан деке пеш вашка.
Сылне мурым муралтен,
Пöрдына ме кож воктен.
Йолна писын тавалта,
Шÿм-чоннаже йывырта.
Сай отметкынам ончалын,
Шыргыжале Кугыза.
Пöлек-влакым кучыкталын,
Уныкажым вÿчкалта.