Сылнымут алан чоным сымыстарыше

Россий писатель ушемын Марий Элысе пӧлкаштыже 63 йыжыҥъеҥ (член) уло. Председательлан Марий Эл Республикысе тӱвыран сулло пашаеҥже С.Д.Архипова латик ий ышта.

Светлана Дмитриевна, ушемыште кажне ийын у еҥ ешаралтеш. Тений устан возышо-влак радамыш мынярын ушненыт?

– Тений профессиональный возкалыше-шамыч ушемышкына вич сылнымутчо ушнен. Иктыже – прозаик Екатерина Клюжева. Лудшо-влаклан тудо «Еще чашечку?» рушла лукмо йоча книга дене палыме. Тиде сылнымут пашам писатель ушемна Москосо Печать да книгам лукмо шотышто агентстве гоч проект полшымо дене савыктен. Екатеринан возымо йомакше, ойлымашыже-влак моткоч оҥай улыт. Шкеже программистлан пашам ышта, садлан, очыни, серыме стильже молын деч ойыртемалтеш, эсогыл мистике шӱлышат южо возымаштыже палдырна. Тиде ойлымаш Москошто лекше «Октябрь» сылнымут журналыште савыкталтын да Россий кумдыкышто самырык писательлан чапым конден.

 

Вес мутмастар – Раисия Сунгурова. Тудо кызыт Сургут кундемыште ила. «Чайгоркаште сандалык», «Кава вола копаш», «Ош шовычан у эр» да моло сылнымут саскаже дене палыме.

Пытартыш ийлаште сылнымутышто Игорь Попов шке усталыкше дене куандара. Тудын «Поро эр, ош куэр!», «Поч омсатым» книгаже-влак савыкталтыныт. Игорьын ятыр почеламутшым Россий писатель ушем член Геннадий Смирнов рушаҥден. Сылнымутышто И.Попов эше йот йылмыла гыч кусарыше семынат тырша.

Вес чолга писательна – Елизавета Егоркина. Курыкмарла лекше «Ӹла гӹнь шӹдӹр шӱмыштет» книгашкыже моткоч оҥай повесть ден ойлымаш-влакым пуртымо. Йоча-влаклан почеламут аршашыже кумылым нӧлта. Елизавета Яковлевна эше романым воза. Тыгайже Марий Элыште шагал. Тудо марий ӱдырамаш-влак коклаште кумшо тыгай писатель.

Визымше йыжыҥъеҥна – Константин Бурнашев. Возымыжо рушла савыкталтше «Литера» журналыште чӱчкыдын лектеш. Произведенийжым Интернет кумдыкыштат лудаш йӧн уло. «По ту сторону зеркала», «Алая лента» книга-влакын авторжо. Нылытынже: Игорь Попов, Раисия Сунгурова, Екатерина Клюжева, Константин Бурнашев – самырык улыт. Нуно тӱрлӧ конкурсышто мастарлыкышт дене кумылым нӧлтат. Игорь Попов тений Олык Ипай лӱмеш премий дене палемдалтын. Тыгай сеҥымаш моткоч куандара.

Российыште савыктен лукмо книгалашке самырык автор-шамычын пашашт темлалтыт мо?

Российыште Сылнымут идалык семын 2015 ийым увертарыме ыле. Марий кундемыштат тудым пеш сайын эртаренна. Поэзий альманахыш кок самырык авторын, Татьяна Соловьеван да Игорь Поповын, поэзий аршашышт пуреныт.

Россий кӱкшытыштӧ книга-влакым лукташ кызытат тыршена, проект-шамычым возена. Тений школышто тунемше икшыве-шамычлан пӧлекым ыштышна. Тӱрлӧ кундемыште илыше йоча-влакын йомакыштым чумырен, «Кузе рывыж мераҥым ондален» книгам савыктен луктынна. Комжым сымыктыш аланыште чолган тыршыше самырык сӱретче Мария Клюкина сӧрастарен. Кызыт кок книгам савыктен лукташ ямдылена. Иктыже – «Марий калык модыш-влак». Кум ий ончыч чумырымо тыгай паша марла лектын. Ынде руш йылме дене лекшаш. Погымо материалым школлаште, йочасадлаште кучылташ пеш йӧнан да пайдале.

«Мырлыше Пырыс ден Пикпик» книгам йоч а — шамычлан пӧлеклыме. Икшыве-влаклан тудым чиялташ кучылташ пайдале. Тиде книгам кок ий ондак шке окса кӱшеш рушла «Вот идёт мурлыка Кот!» лӱм дене савыктен луктынам ыле. Почеламут-влакым поэт да Россий писатель ушемын йыжыҥъеҥже-влак Анатолий Спиридонов ден Геннадий Смирнов рушлаш кусареныт…

Умбакыже 27 ноябрьыште лекше номерыште лудса. Тыгак онлайн-кевытыште налаш лиеш.

Зоя ТИМОФЕЕВА.