31 июльышто Юлсер кундемыште «Кум храм» кросс икымше гана эртаралтын. Тудо Русьым тынеш пуртымылан пӧлеклалтын. Тушко Марий Эл, Татарстан, Виче кундемла гыч 40 утла еҥ толын.
Спортсмен-влак Волжский районысо Шарача селаште верланыше Дмитрий Солунский лӱмеш черке, Раифский монастырь да Ӱлыл Азъялысе святитель Гурий Казанский лӱмеш черке дене палыме лийыныт.
Куржталмаш кок йыжыҥ гыч шоген. Икымше йыжыҥыште 10,5 меҥгым куржаш кӱлын. Шарача села гыч Раифский монастырь марте чодыра да ялла кокла гыч эртыман ыле. Тушто спортсмен-влакым шокшо чай, йӱштӧ вӱд да тӱрлӧ шере кочкыш дене вашлийыныт. Нунын дене пайдале мутланымашым эртареныт. Тылеч вара кокымшо йыжыҥыш, вич меҥге утла кужытым, Ӱлыл Азъял марте куржаш кӱлын. Святой Гурий лӱмеш черкыште спортсмен-влакым шокшо кочкыш вучен. Тылеч вара участник-влак храмым, святой вӱд дене йӱштылмӧ верым, мӱкш отарым ончал савырненыт. Сеҥыше-влакым тӱрлӧ ийготан-влак коклаште палемденыт.
