Школышто тунемше самырык тукым тыныс мландыште икте-весым пагалымашым аклен мошта мо? Лач ты амал дене шукерте огыл Шӱргыял школышто патыр салтак-влакын авашт дене вашлиймашым эртарышна.
Ончыч Шӱргыял школышто, а вара Кораксола тӱвыра пӧртыштӧ нунын лӱмешак концертым ончыктышна. Тушто «Муро кумыл» фольклор ансамбльын участникше да Шӱргыял школышто тунемше-шамыч мастарлыкышт дене куандарышт.
Морко район Кинер вел гыч спецоперацийыш 15 пӧръеҥ каен, тушечын кок еҥжын ӱмыржӧ кӱрылтын. Йоплан ялын эргыже Алексей Герасимов — спецоперацийыште. Аваже Римма Андреевна чон коржын каласкалыш да самырык тукымлан шочмо мландын чын патриотшо лияш тыланыш. «Муро кумыл» ансамбльнан эн чолга участницыже Валентина Георгиевна Игнатьева Алексей эргыжын спецоперацийыште кредалмыж нерген каласкалыш.
Шӱргыял школ ден Кораксола тӱвыра пӧрт ваш келшен пашам ыштат. Идалык мучко могай-гына мероприятий огеш эртаралт. Ме ик кугу вий дене самырык тукымым шочмо мландым аралаш да йӧраташ туныктена. Тидын дене сӧй пасушто йӱд-кече мемнан тыныс илышна верч кучедалше салтак-влакланат сеҥымашыш шуаш мыняре-гынат надырнам пыштена. Тек толеш мемнан тӱняшке тыныс илыш эрелан!
Елена Григорьева, Шӱргыял школын вожатыйже, Кораксола тӱвыра пӧртын вуйлатышыже.
