13 январьыште, Российысе Печать кечын, премьер-министр Михаил Мишустин, 2025 ийым иктешлен, СМИ аланыште Россий Правительствын премийжым кучыктен. Чылаже 19 наградым пуымо, тышеч 5 – посна журналистлан, а молыжым – коллектив-влаклан. Наградым налше-влак коклаште СВО темым ончыктышо пашан да историйысе шарнымашым аралаш полшышо проектын авторышт улыт.
Лауреат-шамычым палемдена:
- Запорожьесе дрон атаке годым колышо Семён Ерёмин, тыгак тудын коллегыже-влак Дмитрий Зименкин, Валентин Трушнин, Владимир Сотников;
- СВО тӱҥалмеке, фронтыш шке кумылын кайыше «Комсомольская правда» газетын спецкоржо Григорий Кубатьян; сусыргымеке, военкор семын тырша;
- НТВ-н корреспондентше Илья Ушенин;
- «Поток» операций кайыме нерген палдарыше «Икымше каналын» пашаеҥже-влак: Амир Юсупов, Валентин Стуканог да Илья Репнин;
- Фронтысо илышым ончыктымыштлан «Белгородская правда» газетын, «Радио Альянск» командын, «Дон 24» телеканалын коллективышт палемдалтыныт.
Тыгак «Регнум» увер агентствылан «Погибли за правду», «Рязанские ведомости» газетын «Военкоры» проектыштлан, «Родина» журналын историйын фальсификацийже ваштареш кучедалме материал-влаклан да «История» телеканалын тӱҥ редакторжо Алексей Денисовлан фильм-влакым ямдылымыжлан Правительствын премийжым кучыктеныт.
Регионлаште тыршыше-влакымат наградитленыт. Нунын коклаште – Смоленск гыч «Юнилайн» издательстве, Иркутск гыч «Сибирячок» журнал, «Радио «Пурга» радиоканалын шеф-редакторжо Анастасия Лаврентьева, «Вечерняя Москва» газетын редакторжо, «ТВ Центр», «ТВ-новости» телеканал-влак, «Радио России» ВГТРК-ан коллективше да «Мой ласковый и нужный зверь» тӱнямбал премийын организаторжо-влак.