Россий Социальный фондын Марий Элысе пӧлкаже да спецоперацийын участникше-влаклан полшышо «Ачамландым аралыше-влак» кугыжаныш фондын регионысо филиалже пырля пашам ыштыме шотышто ойпидышым ыштеныт. Нуно кугыжанышын пуымо выплате да льгото нерген умылтарыме пашам шукташ тӱҥалыт.
«Ачамландым аралыше-влак» фондын филиалжым вуйлатыше Ренат Магсумов палемден: фонд СВО-н ветеранже-влаклан документым ышташ, боевой действийын ветеранже але инвалид улмым пеҥгыдемдыше удостоверенийым оформитлаш, медицине реабилитацийым эрташ, психологический полышым налаш полша. А Россий пенсионный да социальный страхований фондын отделенийже дене пырля пашам ыштыме СВО-н ветеранже-влаклан эше писынрак полшаш йӧным пуа.
Россий Социальный фондын регионысо отделенийжын управляющийжын алмаштышыже Андрей Леухинын мутшо почеш, Социальный фондын клиентский службылаштыже СВО участник-влакым посна режим почеш приниматлат. Нунылан закон почеш социальный выплатым да компенсацийым тӱлат. Колышо военный-влакын родо-тукымышт ден лишыл еҥыштынат льгото ден пособийлан, тыгак ешартыш пенсионный обеспеченийлан правашт уло.