Тиде историй иктаж 15 ий ончыч лийын. Университетым тунем пытарымеке, оласе ик предприятийыш пашаш пуренам да ола тӱрысӧ ик пӧртын пелыжым айленам. Тиде тыглай ялысе тошто пӧрт ыле. А окна-влак пеш ӱлнӧ лийыныт, уремыште эртен кайыше-влакын йолышт гына койын. Тушко шыжым илаш кусненам.
Тудо ийын У ий пайремлан ялыш каен омыл, олаштак кодынам. Ик лукеш изирак кожым сӧрастаренам, шкаланем ситыше ӱстелым погенам. У ийым вашлийым да икмыняр жап телевизор дене передаче-влакым ончышымат, малаш возым. Мален гына колтышым, колам, пуйто ала-кӧ нелын шӱла, пӧрт туврашыште ошкедыме йӱк шокта. Ончыч пешыже шымат лӱд: пӧртын вес пелыштыже илыше пошкудем-влак пайремым ыштеныт да пӧрт туврашыш кӱзеныт, шоненам.
Адакат мален колтышым. Ындыже мыйын одеялем пуйто ала-кӧ поген налнеже, шупшеш. Одеялым кормыжтен кучен, мый тугак койкышто тарваныде кием. Вара колам, пуйто воштончыш ончыл ӱстелыште ала-кӧ пургедеш, косметикем ик вер гыч вес верыш шындедылеш. Пырысем тушко кӱзен манын шоналтышым, а вара йолем дене шижам — тудо воктенемак кия. Тунам чынжымак лӱдым. Пӧртыш шолыштшо пурен, очыни, манын шонаш тӱҥальым.
Тарванаш лӱдын кием, иктаж 15 минут гыч чыла шыпланыш, да мый, тӧрштен кынелын, иканаште тулым чӱктышым. А пӧртыштӧ иктат лийын огыл. Чыла вере кычал нальым, иктат уке. Телевизорым чӱктышым да одеял йымак пурен возым. Ик жаплан нералтенат колтышым. Помыжалтмекем ӧрым: телевизорым чарыме, тулым йӧртымӧ. А мый сайын шарнем: пӧлемыште тулым йӧртен омыл, телевизорат чӱктымӧ лийын. Тылеч вара малаш возаш шым тошт — кофем темышым да эр марте телевизорым ончен шинчышым. А вес кечынже сумкам погалтышым да каныш кечылан ача-авам дек кудальым.
Тиде пӧртыштӧ тетла шкетын шогаш лӱдынам. Каныш деч вара тушто йолташ ӱдырем дене коктын илаш тӱҥалынна. Тетла йӱк шоктен огыл. У ий йӱдым кӧ мыйым лӱдыктен, каласен ом мошто. Ойлат, пуйто суртводыж илышыште лийшаш вашталтыш нерген тыге шижтара. Чынжымак, тылеч вара илышыштем ойго лийын.
Валентина.
Йошкар-Ола.
Интернет гыч налме фото.