Кызытсе жапыште икмыняр йот йылмым палет гын, ончылнет кумда корно почылтеш, вес калыкын илыш умылымашыжым, тӱня ончалтышыжым, койыш-шоктышыжым палаш тӱҥалат. Килемар район Пистерлä ялеш шочын-кушшо Екатерина Шишокина МарГУ-што тӱнямбал кыл направлений дене кумшо ий тунемеш. Тудо вузысо тӱрлӧ мероприятийыш кумылын ушна, волонтёр пашам чолган шукта да кеҥежым проводниклан пашам ышта.
Изинек чулым
Екатерина йоча годсек чолга. Арде кыдалаш школышто ик эн уста тунемше лийын. Тӱрлӧ мероприятийыш, конкурсыш, олимпиадыш кумылын ушнен. Тыгодым артист койышыжат палдырнен. Изирак класслаште тунеммыж годым школысо театральный кружокыш коштын.
– Театр кружокышто шындыме «Ший памалче» спектакль дене ме «Самырык тукым» республикысе конкурсышто 1-ше верым налынна ыле. Варажым ты кружокыш коштмым чарнышым. Почеламутым сылнын лудын моштенам. «Живая классика» Российысе конкурсышто шкем терген онченам. Руш, курыкмарий, англичан йылмыла, историй, обществознаний дене районысо олимпиадылашке чӱчкыдын коштынам. Курыкмарий йылме дене олимпиадыште республикыште шкем тергенам, – мане ӱдыр.
Йот йылмым тунемеш
Школ деч вара Екатерина юрист лияш кумылжо лийын, вузысо юридический факультетыш документым пуэн. Но йот йылмылам йӧратымыже МарГУ-со калыкле тӱвыра да тӱвыра кокласе коммуникаций институтыш конден. Тыште Екатерина англичан да француз йылмылам тунемеш. Ӱдырын мутшо почеш, француз йылме моткоч сылне да пушкыдо. Тидыжак тудын кумылжым налеш.
Студент пагытшым Екатерина чолган эртара. 1-ше курс гыч тудо волонтёр пашам шукта, вузышто, республикыште эртаралтше тӱрлӧ мероприятийыште полышкала. Тыгак шанче пашалан кумылан, вузысо конференцийлаште докладым ышта.
– Тунемаш пурымеке, шкем тӱрлӧ аланыште тергаш тӱҥалам манын, шкан ойленам. Икымше курсышто «Голос юности», варажым «Студенческая весна» фестивальлашке ушненам. Тыштак волонтёр пашалан кумылаҥынам. Кодшо ийын Марий Элыште эртыше начарын ужшо да сокыр-влакын Российысе спартакиадыштышт участник-влакым коштыктенам, кӱлеш верыш наҥгаенам. Фигурный мунчалтымаш дене таҥасымашыште волонтёр лийынам. Кызытат вузышто шуко мероприятий эртаралтеш, тушкат шуаш тыршем.
Шанче пашаште шкем икмыняр ий тергем. Экономике, политике, тӱрлӧ политический процесс дене кылдалтше теме-влакым тарватем, – ойла Е.Шишокина.
Кеҥеж каныш – пашаште
Кеҥеж жапыште Екатерина проводницылан тырша. Ты пашаш тудо кодшо ийын ушнен да тӱрлӧ мотор верым ончен савырнен. Тыгак ӱдыр проводник-влакым иктеш ушышо Марий Элысе «Регион 12» студенческий отрядышкышт коштеш. Тушко чылаже 80 еҥ погына.
– Проводниклан очно да онлайн тунеммеке, ик ӱдыр дене Санкт-Петербургыш пашам ышташ кайышна. Кажне рейс деч вара ты пашам мылам утыр келшаш тӱҥале. Тыште тыгай кугу опытым налына. Ме официантке семын тыршена, арулыкым эскерена, чайым, кӱлеш сийым ужалена, тыгак еҥ-влак дене психолог семын кутыраш тунемына. Кечывалвел регионлаште, Шем теҥыз воктене лийынам. Рейс дене Абхазийыш, Ейск, Новороссийск, Моско, Смоленск олалашке миенна.
«Регион 12» студент отрядым 2006 ийыште чумырымо. Тушко ик пашам шуктышо студент-влак погынат. Шкенан командирна, комиссарна улыт. Тений ме Марий Турек район Кугу Карлыган ялышке миен коштынна. Интернат-пӧртыштӧ концертым ончыктенна, шоҥго, шкет илыше еҥ-влаклан полышкаленна, – каласыш Е.Шишокина.
Кеҥеж сессий деч вара тений тудо уэш рейсыш тарвана. 2022 ийыште ӱдыр эше Ижевскыште Юл кундем федеральный округын эртарыме слётыштыжо лийын.
Е.Шишокина шкенжым вияҥдаш эре тырша, книгам лудеш. Яра жапше годым киношко, театрышке, выставкышке коштеш. Ӱдырлан ончыкыжымат тыгаяк чолга кодаш да эре ончыко каяш тыланена.