Йошкар-Олаште С.Чавайн лӱмеш Калыкле книгагудышто «Академический рисунок» выставке почылтын. Тушто Марий Элын сулло художникше Валерий Чеботкинын студентше-влакын пашашт ончыкталтеш.
Валерий Александровичым республикна деч ӧрждыжтат палат. 2005 гыч тудо Чувашийысе И.Я.Яковлев лӱмеш педуниверситетын изосымыктыш да дизайн кафедрыжын преподавательже, доцентше. Выставкым почмо годым студент паша-влак гыч ончыктен: кузе тыглай тунемше профессионал марте кушкеш, натюрморт гыч тӱҥалын кок фигуран неле постановкым шочыктат. Экскурсий годым академический сӱретым ыштыме мастарлык нерген палдарен.
Экспозицийыште тыгак В.Чеботкинын ямдылыме «Русская живописная школа: традиции и метод», «Школа академического рисунка», «Композиция академического рисунка» тунемме пособийже-влакын презентацийышт лийын.
Выставке 2024 ий 31 январь марте пашам ышта.
