Марий Элыште кокла профессиональный шинчымашым налше ӱдыр-рвезе-влак коклаште «Студент шошо Марий Эл – 2022» усталык фестивальын регионысо этапше мучашлалтын.
Тушко чылаже республикысе 18 ссуз гыч 160 утла студент погынен.
Студент-влак шым направлений: вокал, семӱзгар дене шоктымаш, куштымаш, театр, модо, журналистике, видео – почеш 56 номерым ончыктеныт. Гран-прим И.К.Глушков лӱмеш Оршанке посёлкысо шуко профилян колледжыште 1-ше курсышто тунемше Даниил Давыдов сеҥен налын.
Марий Элыште профессиональный тунемме организацийла гыч «Российская студенческая весна» XXX фестивальышке каяш делегацийым погымо. Финал 3-8 июньышто Челябинск олаште лиеш.
Даниил Давыдов, И.К.Глушков лӱмеш Оршанке посёлкысо шуко профилян колледжын студентше (снимкыште шола тӱрыштӧ):
– Мый Медведево районысо Кузнецово селаште шочын-кушкынам. Колледжыште физкультурым туныктышылан тунемам. Гран-прим сеҥен налмемлан трукышто ӧрынам да чот куаненам. Фестиваль оҥайын эртен. Вет тыште студент-влак шке мастарлыкыштым кӱкшын ончыктеныт.
Фестивальыште мый саксофон дене шоктенам. Ты семӱзгарым «шымлем». Колледжыште кок номерым аклаш луктынам: вальсым, «Мераҥ нерген муро» семым. Кокымшо композиций дене жюри ончык лектынам.
