Йошкар-Оласе Столичный бизнес колледжын тунемшыже-влак Марий Эл Республикын командыж дене пырля Ростов областьыш гуманитарный полышым наҥгаеныт.
Ӱдыр-рвезе-влак кок арня жапыште моло волонтёр дене пырля еҥ-влаклан полшеныт, гуманитарный складыште тыршеныт, вургемым, моло арверым сортироватленыт, маскировочный сеткым пидыныт.
Нине студент-влак «Защита в чрезвычайных ситуациях» специальность дене шинчымашым погат. Ростов-на-Дону олаште лиймышт нерген каласкалышт.
Кирилл Глушков:
– Ме сайынак миен толна. Тушко миен шумеке, эн ончычак Дмитрий куратор дене палыме лийна. Эрдене базыш кайышна, тушто мемнам вургемым сортироватлаш, маскировочный сеткым пидаш да командыште пашам ышташ туныктышт. Кастене мемнам мӧҥгеш тӱшкагудышко наҥгаеныт. Тушто ме икте-весе дене мутланенна, шонымашна дене палдаренна. Пытартыш кечын дипломым кучыктышт, шуктымо миссийна дене саламлышт. Йӱдым ме шочмо верышкына каяш тарванышна. Чеверласымат шуын огыл, поснак кураторна дене, вет тудо мыланна пеш лишыл еҥыш да ӱшанле йолташыш савырнен, тӱрлӧ жапыштат полшаш вашкен.
Полина Нетепина:
– Ме складыште пашам ыштенна: вургемым сортироватленна, сеткым пидынна, коробка-влакым газельыш оптенна, нуным шотленна. Варажым тидым элнан у территорийлашкыже да специальный военный операцийысе боец-влаклан наҥгаеныт. Икымше кум кечыште маскировочный сеткым пидынам. Тиде чытышым йодшо, эркын ышталтше паша. Сеткым шуко ышташ кӱлын. А моло кечылаште тӱрлӧ заданийым шуктенам – вургемым шотлымо, тудым идалыкын посна жапше дене ончен, посна оптедыме. Шымше кечынже ме Мариупольыш кайышна, ола мучко изирак экскурсийым эртареныт. Тыгак Мариупольышто тӱшкагудышто илыше илалшырак еҥ-влаклан полшенна, йоча-влак дене лийынна. Варажым коробкалашке модышым, канцелярийым, кидпашалан тӱрлӧ материалым, книгам да молымат посна оптеденна.
Кирилл Левит:
– Мыланем Ростов-на-Дону олаш миен толмаш – ты идалыкысе кугу событий. Мый шкенан боец-влаклан полшаш ятыр жап шонен коштым. Тиде миен толмаш шке шонымашкем шуаш полшыш.
Эльвира Терентьева.
