2015 ийыште Оршанкысе педколледж ден тысе Индустриальный техникумым иктыш ушеныт. Ынде тудо Оршанкысе И.К.Глушков лӱмеш шуко профилян колледж маналтеш. Тушто С.Н.Мотовилова директорлан ик ий наре пашам ышта. Светлана Николаевна шкежат ты колледжым (тунам педколледж) тунем пытарен. Тылеч ончыч Оршанке районысо образований пӧлкаште тыршен, садлан самырык-влак дене ыштыме паша тудлан у огыл. «Ӱдыр-рвезе-влак соцсетьлан утларак жапым ойырат. Тиде – кызытсе саман самырык тукымын ойыртемже. Нунын тиде ойыртемыштым моштен кучылтман да сай пашаш виктарен колтыман», – мане Светлана Николаевна.
Ӧрдыж кундем гыч толыт
Кызыт колледжыште 747 ӱдыр-рвезе тунемеш, нунын кокла 427-ше – очный пӧлкаште. Педагогике направлений дене кум специальностьлан ямдылат: тӱҥалтыш класслам туныктышо, школ деч ончычсо воспитаний да физический культур. Тыгак автомобильым олмыктымо шотышто мастерлан, повар-кондитерлан, информационный системе ден программированийлан туныктат. Кӱчык жаплан келыштарыме программе почеш (кугыеҥ-влакат тунем кертыт) трактористлан, ургызылан, ЭВМ операторлан тунем лекташ лиеш. Заочный отделенийыште тунеммылан гына оксам тӱлыман, очный отделенийыште тунемше ӱдыр-рвезе-влак яра тунемыт. Ӧрдыж верла гыч тунемаш толшо студент-шамычлан илашышт кок тӱшкагудо уло.
– Колледжыштына республикысе чыла манме гаяк район гыч ӱдыр-рвезе-влак тунемыт. Тыгак Пермь, Угарман ден Киров кундемла, Ямал-Ненец ден Хант-Манси автономный округла, Коми Республик гыч студент-влакат улыт. Тора кундем гыч толшо ӱдыр-рвезе-влакын ачашт але авашт шке жапыштыже тиде колледжыште тунемыныт, садлан икшывыштат тиде тунемме верым ойырен налыныт, – манеш С.Н.Мотовилова.
Нылымше мастерскойым почыт
«Образований» нацпроектын «Молодые профессионалы» федеральный проектше дене келшышын, 2024 ий мучаш марте Марий Элыште кыдалаш профессиональный шинчымашым пуышо организацийлаште 30 мастерскойым почаш шонат. Вес ийын «Worldskills» таҥасымашын йодмашыжлан келшыше материально-технический базан 11 мастерскойым почыт. Оршанкысе шуко профилян колледжыште «Обслуживание транспорта и логистика» направлений дене мастерскойым ыштат. Колледжыште тиде мастерской нылымше лиеш. Ӱмаште «Физкультур, спорт да фитнес» направлений дене мастерской почылтын. Тылеч ончыч «Школ деч ончычсо образований» да «Тӱҥалтыш класслам туныктымаш» мастерской-влакым келыштарыме. Тыгай мастерскойлаште кугу кӱкшытан профессионалым ямдылаш материально-технический базым ямдылыме. Тушто «Ворлдскиллс Россия» регионысо чемпионатымат эртараш лиеш. Тыгай площадке-влак туныктымаште у йӧным кучылташ, «Ворлдскиллс Россия» стандартлан келшышын специалист-влакым ямдылаш, материально-технический базым уэмдаш полшат.
– Чаманен каласыман,туныктышо профессийлан тунемаш пураш кумылан еҥ-влак шагалемыт. Тидыже изи пашадар дене кылдалтын. Но тидын шотышто Россий Правительствыште кызыт шуко ойлат, каҥашат. Сандене ончыкыжым туныктышо профессийын статусшо кушкеш да тунемаш пурышо-влак коклаште конкурс ончычсо семынак кугу лиеш манын ӱшанем, – манеш Светлана Николаевна.
Конкурслашке ушнат
Колледжыште шуко мероприятий эртаралтеш. Теве, мутлан, тиде арнян колледжын тоштерже кыдалаш профессиональный шинчымашым пуышо учрежденийын эн сай тоштерже республикысе конкурсыш ушнен. Тидын нерген колледжын кугурак методистше О.В.Летова каласкалыш:
– Тоштерыштына колледжын историйже, тыште пашам ыштыше педагог ден директор, выпускник-влак нерген увер-влакым чумырымо. Экспозицийым эре вашталтен шогена. Ты конкурслан, мутлан, колледжын педагогшо, художник Геннадий Иосифович Летовлан пӧлеклалтше экспозицийым ямдыленна. Тушто студент-влаклан тудын илыш корныж дене, сӱретлыме пашаже-влак дене палдарена.
Ик еш гай коллектив
А.Ю.Шашкова колледжыште методистлан пашам ышташ тений тӱҥалын. Тыгак естествознанийым, краеведенийым, калык-влакын тӱвырашт да сымыктышышт дисциплине-влакым вӱда. Анна Юрьевна – шкежат Оршанке педколледжын выпускникше.
– Колледжыште тунемше-влаклан чыла шотыштат полшаш тыршат, ӱдыр-рвезе-шамычым тӱрлӧ могырым шуараш шагал огыл паша ышталтеш. Студент «отлично» отметкылан ок тунем гынат, тудо, мутлан, спорт таҥасымаште ончыл верыш лектеш але моткоч моторын мура да сценыште шкенжым сайын куча. Коллективна дене ик еш гай улына, ваш умылена, полшен шогена. Тидым студент улмем годым умыленам да кызытат шижам. Тидак кажне кечын нӧлталтше кумыл дене пашаш кошташ кумылаҥда, – манеш Анна Юрьевна.
Ик могырым ончалаш гын, самырык тукым вашталт толеш манын шукын ойлат. Вес могырым, ӱдыр-рвезе-влак кеч-могай пагытыштат эре тыгаяк весела, чулым, ум кычалше улыт. Нунын дене кылым гына муын моштыман. Оршане посёлкысо шуко профилян колледжыште тидым сайын палат.