3 гыч 8 июнь марте Челябинск олаште икымше гана ХХХ-шо «Российысе студент шошо» фестиваль эртен. Тушко Российысе 60 утла колледж ден техникумла гыч 2000 утла студент ушнен. Марий Эл Республикын делегацийжат фестивальыш миен коштын. Делегацийыш республикысе колледжла гыч куд эн тале студент-влакым ойыреныт. Нуно фестивальыш толшо участник-влаклан да жюрилан творческий номерым ончыктеныт.
Фестивальыш шке олалаштышт сеҥыше коллектив-влакым ÿжыныт. Студент-влак вокал, куштымаш, театр, кызытсе илышлан келшыше тÿрлö жанр, мода, медиа, арт да моло программылаште шке мастарлыкыштым ончыктеныт.
Ты кечылаште Челябинск оласе Пушкин садыште «фестивальный городок» пашам ыштен. Кажне кумылан еҥ кумдан палыме еҥ-влакын лекцийыштышт, мурымо але куштымо шотышто мастер-классыште, кеҥежымсе КВН-ын кубкыштыжо участвоватлен кертын. Кажне кечын ВМХ, скейт да WorkOut-шоу-влак эртаралтыныт. Тыгак диджеинг, арт направленийын участникше-влак шке мастарлыкыштым ончыктеныт.