Чолга да уста ӱдыр. Шонымашке шуаш кеч-кунамат тырша, тӱҥалме пашам мучаш марте шукта. Тыгодым сайын тунемеш, педагог лияш ямдылалтеш. Тиде – Шернур кундемын ӱдыржӧ, МарГУ-со Калыкле тӱвыра да тӱвыра кокласе коммуникаций институтышто кумшо курсышто тунемше Анжелика Конакова.
Туныктышо лияш изинек шонен
Анжелика Тулгем ялеш шочын-кушкын, Марисола кыдалаш школышто шинчымашым налын. Марий шӱлышан улмыж дене изинек ойыртемалтын. Шочмо йылмым йӧратен тунемын, тыгодым олимпиадылашке коштын, шуко гана ончыл верым налын. Сылнымутлан шӱман лийын, мутын ямжым шижын моштен. Икмыняр ойлымашым возен ончен, газет-влак дене пеҥгыде кылым кучен. Ончыкылыкшым марий йылме денак кылдаш манын, МарГУ-шко тунемаш толын. Тудо марий йылмым, литературым, англичан йылмым, тӱҥалтыш класслам туныктышо лияш ямдылалтеш.
– Ты корным ойырен налаш эше тӱҥалтыш классыштак шоненам. Варажым юрист лияш кумылаҥынам. Школышто марий йылмым туныктышо Светлана Мартыновна Максимовалан таум ойымо шуэш. Тудо шочмо йылмылан шӱмаҥден кертын. Марий йылме дене олимпиадыш коштын, туныктышо профессийым ойырен налынам. Шарнем, 10-шо классыште тунемме годым регион-влак кокласе олимпиадыште кокымшо верыш лектынам ыле. Кугурак класслаште шуко гана сеҥенам. МарГУ-шко тунемаш пурымо годым творческий экзаменлан вигак 100 баллым пуэныт, – мане тудо.
Волонтёр
Студент пагытшым Анжелика чолган, куанлын эртара. Вузысо, институтысо тӱрлӧ мероприятийыште волонтёр семын тырша, тыгодым олимпиадылашке ушна. 22 майыште институтыштышт «Кугу финн-угор» форум эртаралтеш. Тений тушто Анжелика икымше гана докладым ышта.
– Студент пагытем оҥайын эрта. Тӱрлӧ вере ушнаш тыршем. Вузыш тунемаш пурымекак, волонтёр лийынам. Тӱҥалтыш кок ийыште вузысо, тыгак рӱдоласе марий мероприятийыште полышкаленам. Нунын кокла гыч «Мунло» модышым, Марий тиште кечым, Финн-угор форумым да молымат палемден кодаш лиеш.
Вузышто финн-угор, психологий олимпиадылаште шкем тергенам. Психологий дене кок статьям возенам да иктыжым форумышто лудынам. Таче мый финн-угор форумлан ямдылалтам, шанче туныктышем Лидия Сидоровна Матросова дене пырля марий йылме дене статьям возем. Лӱм мутын ышталтмыжым шымлем.
Мый почеламутым сылнын лудаш йӧратем. Занятийыште чӱчкыдын лудам, – палдарыш А.Конакова.
Кеҥежым пашам ышта
Анжелика тыршен тунемеш, шуко гана сессийым чыла «визытанлан» кучен. Тений май мучаште сессий тӱҥалшаш, южо предмет дене чот ямдылалтман, мане. Ӱдыр кеҥежым арам огеш эртаре, оксан лияш манын, пашам кычалеш. Тудо йоча лагерьыште вожатыйлан кок гана ыштен. Икымше курсышто тунеммыж годым Моско воктенысе ик йоча лагерьыште тыршен, ӱмаште – МарГУ пеленысе лагерьыште. Тиде кеҥежымат ты пашаш каяш але приёмный комиссийыште тыршаш шона.
Анжелика тений телым аэройого дене заниматлаш тӱҥалын, тушто мастер-классыш ушна. Лыжга тӱрлӧ упражненийым ыштен, уло чонге канет, каласыш ӱдыр.
Ончыкылан тудо университетым сайын тунем пытараш, школыш пашаш каяш шона.