
Мыняре?
Российыште 1249 вуз уло. Нуно элнан 270 олаштыже верланеныт. Мутлан, Москошто 300 утла вуз уло, Санкт-Петербургышто – 88, Новосибирскыште – 30, Екатеринбургышто – 30, Озаҥыште – 30, Самарыште – 20. Тыгак Нижний Новгород, Ростов-на-Дону, Омск, Краснодар, Воронеж, Пермь, Волгоград, Саратов олалаште шуко вуз верланеныт.
Йошкар-Олаште ныл вуз уло. Тиде – Марий кугыжаныш университет (МарГУ), Поволжский кугыжаныш технологический университет (ПГТУ), Межрегиональный открытый социальный институт (МОСИ). Тыгак 2022 ийыште Марий Эл Республикын кӱшыл тунемме заведенийжылан iSpring институтым шотлаш тӱҥалыныт.
Балл
2024 ийыште Российысе вузлаш бакалавриат да специалитет программыла дене бюджет верыш тунемаш пураш ик предмет дене кокла балл 58 лийшаш. Эн кугу балл (100-92 балл ик предмет дене) Россий Федерацийын прокуратур университетыш, Москосо кугыжаныш медико-стоматологический университетыш кӱлеш.
Марий Элыште iSpring институтыш логалаш манын, 75 деч шукырак баллым погыман, МарГУ-ш – 41 деч утларак, ПГТУ-ш – 39 деч шукырак, МОСИ-ш – 55 деч утларак баллым.
Студентлан – стипендий
«Студент» мутым Римысе поэт Овидий икымше гана кучылтын. Латин йылме гыч кусараш гын, тудо сайын тунемше да пашам тыршен ыштыше еҥ манмым ончыкта.
«Стипендий» мут латин йылмысе «пендо» мут гыч лектын. Тудо «вискалаш» манмым ончыкта. Акрет Римыште пашадарым висен пуэныт. Тышеч студент-влаклан тылзе еда пуалтше оксан лӱмжӧ шочын.
Тунемаш, тунемаш…
Тӱняште эн кужу шпаргалке 600 метрыш шуын. Студент-влак тудым 16 шагат возен шинченыт.
Российысе ден Японийысе студент-влак экзаменыш шоколадым налыт: иктыштлан тиде ӱнарым пуа, весыштлан – шкешотан талисман. Япон студент-влак поснак «KitKat» шоколадым йӧратат, тудо «обязательно сеҥена» манын кусаралтеш.
Шуко тунемше лекций годым мален колта, сандене Францийыште Нант оласе университетыште студент-влаклан каналташ, малаш лӱмын пӧлемым ыштыме. Тушто шургаш, йӱкын кутыраш огеш лий.