2019-2020 тунемме ийыште 59 еҥ Марий Элым вуйлатышын стипендиатше лийын. Нунын коклаште 9 аспирант уло, 28 студент профессиональный тунемме верлаште, а 22 студент вузышто тунемыт. Кажне тылзын нине ӱдыр-рвезе-влак 1600-3000 теҥге ешартыш оксам налаш тӱҥалыт.
Стипендиат-влак коклаште – Марий лесохозяйственный техникумышто тунемше-влак Ангелина Сунгурова, Юлия Пуртова да Снежана Счастливцева. Ӱдыр-влак йытыра веле огыл, эше ушан да чолга улыт. Кумытынат «Садово-парковый да ландшафтный строительстве» специальность дене тунемыт.
Паша опытым погаш «Worldskills» всероссийский конкурсат полша. Ангелина ден Снежана тушто мастарлыкыштым тергеныт гын, Юлия волонтёр лийын. Ангелина конкурсын регионысо этапыштыже «Ландшафтный дизайн» компетенций дене кокымшо верым налын, Снежана – кумшым.
«Тиде специальность шке шотшо дене моткоч оҥай, кызытсе жаплан келшен толеш. Ты пашалан шуко оксам тӱлат, тӱрлӧ шонымашым илышыш шыҥдараш манын, проект-влакым шонен лукташ келша, санденак тиде специальностьым ойырен налынам», – каласыш Марий Турек посёлкышто шочын-кушшо А.Сунгурова.
Ангелина Марий Турек школышто тунеммыж годым шке вийжым шуко гана тӱрлӧ таҥасымашлаште терген, шукыж годым спорт эстафетыште, кроссышто да куштылго атлетике дене моло ӱчашымашлаште призовой верым наледен. А кызыт чыла вийым да жапым лач тунеммылан ойыра.
Райрӱдыштӧ илыше Сунгуровмыт ешыште ныл йоча уло: кок эрге да кок ӱдыр. Илен-толын, еш пӧртым чоҥынеже. Ангелина дизайнер пашаж дене полшаш шона. Тунем лекмеке, (кызыт пытартыш 4-ше курсышто тунемеш) шочмо олан моторлыкшо верч тыршынеже. Тымарте кок вере практикыште лийын – ПГТУ-н Ботанический садыштыже да «Город» МУП-ышто. А тений апрельыште техникумыштышт профориентаций дене лийше олимпиадыште икымше верыш лектын.
С.Счастливцева Марий Турек район Сукма ялыште шочын-кушкын. Тусо тӱҥалтыш школышто тунемын. Варажым ешышт райрӱдышкӧ илаш куснен. 4-9-ше класслаште шинчымашым Марий Турек школышто поген. Снежана эше школышто тунеммыж годым «Повар» специальностян лийын. Ты жапыштак искусство школышто «Изобразительное искусство» направлений дене тунемын. Сӱрет да творчестве конкурслаште ятыр сеҥымашыже уло.
Ю.Пуртова Йошкар-Олаште кушкын, 27-ше №-ан школым тунем пытарен. Кодшо ийын техникумын командыже профессиональный шинчымашым тергыше брейн-рингыште участвоватлен да икымше верым налын. Юлия ик участницыже лийын. Ӱдырын сеҥымашыжым шотлен от пытаре, техникумышто чыла гаяк мероприятийыште участвоватла да сай результатым ончыкта. «Хайат» араб куштымаш школышто ынде кандашымше ий кушта, школынат, техникумынат чапыштым арала. Ты мастарлыкшым тӱрлӧ фестиваль ден конкурслаште терген, призовой верлашке лектын. Юлия «Мастерская идей-2019» конкурсышто бизнес-проектым возымаште 1-ше степенян дипломым сулен. Тунам ӱдыр «Фитокартины – современный тренд эко декора» проектым возен да шке пашажым темлен.
Эльвира Терентьева.