Йошкар-Олаште илыше Денис ден Света Тетеринмыт Стефания лӱман ӱдырым ончен куштат. Ныл ияш ӱдыр шыма, уым палаш йӧратыше кушкеш. Стефания нерген Светлана каласкала:
– Стефания лӱмым мый пуэнам. Ӱдырна шке шонымашкыже шуаш тырша, ача-аван мутыштым колыштеш, ответственный койыш-шоктышан. Тӱжвал сынже дене чылт ачаже, лач шинчаже мыйын гай канде.
Шукерте огыл Стефания лидер койышым ончыкташ тӱҥалын. Йочасадыште моло ӱдыр-рвезе-влак коклаште кумылжо уло гын, ончылно лияш тырша, уке гын, уто шомакым огешат ойло.
Палем, тыгай лӱман ӱдыр-влак чын верч шогат, поро да шыма улыт. Сай йолташат, манипуляторат лийын кертыт.
Ешыштына ӱдырнам Стефания, Стефания Денисовна але кӱчыкын Стена манына. Ачажым чот йӧрата, тудын деч посна йокроклана. Кызыт Денис пелашем – СВО-што. Ӱдырна изин-кугун ачажым сеҥымаш дене вуча.
Стефания лӱм грек йылме гыч толын. Тудо аршаш, вуйшӱдыш, диадеме манмым ончыкта.